‘चारिटी फर चेन्ज’ वस्त्र वितरण कार्यक्रम सम्पन्न: सेवा मात्र होइन, रोज्ने स्वतन्त्रतासमेत
नोट: यो समाचार १ महिना अघिको हो
बुधबार, साउन १४, २०८२ |
अपराह्न १:२० बजे
विराटनगर । रोटरी क्लब अफ विराटनगर डाउनटाउनको आयोजनामा, रोट्र्याक्ट क्लब अफ विराटनगर डाउनटाउन तथा रोट्र्याक्ट क्लब अफ नोबेल मेडिकल कलेजको सहकार्यमा विराटनगरको सेन्ट्रल मलमा सोमवार “चारिटी फर चेन्ज” नामक वस्त्र वितरण कार्यक्रम सम्पन्न भएको छ।
“थ्रेड्स अफ होप” दीर्घकालीन पहलकदमीअन्तर्गतको यो दोस्रो चरणको कार्यक्रममा २०० भन्दा बढी लाभग्राहीहरूले आफूलाई उपयुक्त नयाँ तथा सफा गरिएको पहिरन आफैं छानेर लैजाने अवसर पाए। यो शैलीले सहयोगप्रतिको आत्म–सम्मान र मर्यादालाई प्राथमिकता दिएको आयोजकहरू बताउँछन्।
बिज्ञापन
कार्यक्रममा झण्डै १,००० थान कपडा—शर्ट, पाइन्ट, सारी, टी–शर्ट, सुट, बच्चाका लुगा, सिरक, ढाकजस्ता सामग्रीहरू प्रदर्शित गरिएको थियो। ती सबै सामग्री रोटरी सदस्यहरू तथा ५० भन्दा बढी सर्वसाधारण मित्रहरूबाट संकलन गरिएका थिए, जसलाई वितरण अघि ड्राइ–क्लिन वा धोएर तयार पारिएको थियो।
दैनिक ज्यालादारी गर्ने, घरेलु कामदार, सुरक्षा गार्ड, सफाइ कर्मचारीजस्ता आर्थिक–सामाजिक रूपमा पछाडि परेका वर्गका मानिसहरूले कार्यक्रममा सहजै सहभागी भई आफूलाई चाहिने कपडा स्वाभिमानका साथ रोजे। क्लबकी अध्यक्षका अनुसार, कार्यक्रमको मूल उद्देश्य केवल लुगा वितरण मात्र नभई आत्म–सम्मान र सद्भाव बाँड्नु हो।
कार्यक्रम सञ्चालनका लागि सेन्ट्रल मलले स्थल निःशुल्क उपलब्ध गराएको थियो। करिब पाँच हजार रुपैयाँ बराबरको टेबल, स्ट्यान्ड र ढुवानी खर्च गरिएको आयोजकहरूले जानकारी दिएका छन्। कार्यक्रममा २० भन्दा बढी स्वयंसेवकहरू सहभागी थिए।
आयोजकहरूका अनुसार बाँकी रहेका कपडाहरू तेस्रो चरण “रिबर्न थ्रेड्स ” अन्तर्गत पुनःप्रयोग गरिनेछन्, जसबाट तकिया आदिमा प्रयोग हुने रेशा उत्पादन गरिने छ। यस अभियानले पुनःप्रयोग र दिगोपनप्रतिको चेतना अभिवृद्धिमा सघाउ पुर्याउने विश्वास पनि आयोजकहरूले व्यक्त गरेका छन्।
शनिबार, आश्विन ०४, २०८२
बिहिबार, आश्विन ०२, २०८२
