काठमाडौँ । भोटेकोशी बाढीका कारण रसुवा, नुवाकोट र धादिङका १८ वटा विद्यालय प्रभावित भएका छन् । तीमध्ये ११ वटा विद्यालय पूर्ण रूपमा क्षतिग्रस्त भएका छन् ।
राष्ट्रिय योजना आयोग र राष्ट्रिय विपद् जोखिम न्यूनीकरण तथा व्यवस्थापन प्राधिकरणले तयार पारेको द्रुत क्षति आवश्यकता मूल्याङ्कन (आरडिएनए) प्रतिवेदनअनुसार विद्यालयका भवन तथा शैक्षिक सामग्रीमा गरी रु ९३ करोड ७३ लाख बराबरको क्षति भएको छ ।
विज्ञापन
प्रतिवेदनअनुसार बाढीबाट १८ विद्यालयका ५६ वटा भवन प्रभावित भएका छन् । ती भवनका १५२ वटा कोठामा आंशिक र १५६ वटा कोठामा पूर्ण क्षति पुगेको छ ।
रसुवाको गोसाइँकुण्ड गाउँपालिकामा एउटा विद्यालय प्रभावित भएको छ । उक्त विद्यालयका दुई भवनका ११ वटा कोठा पूर्ण रूपमा क्षतिग्रस्त हुँदा रु ३ करोड ७५ लाख बराबरको क्षति भएको छ ।
उत्तरगया गाउँपालिकाका तीन विद्यालयका ६ वटा भवनमा क्षति पुगेको छ । ती विद्यालयका ३६ वटा कोठा पूर्ण रूपमा क्षतिग्रस्त भएका छन् । यहाँ करिब रु १२ करोड २९ लाख बराबरको क्षति भएको प्रतिवेदनमा उल्लेख छ ।
नुवाकोटको विदुर नगरपालिकामा नौ वटा विद्यालय प्रभावित भएका छन् । ती विद्यालयका ३२ वटा भवनमा क्षति पुगेको छ । ६१ वटा कोठामा आंशिक र ८९ वटा कोठामा पूर्ण क्षति पुगेको छ । यसबाट रु ३६ करोड ६२ लाख बराबरको क्षति भएको छ ।
धादिङको गल्छी गाउँपालिकाका तीन विद्यालय प्रभावित भएका छन् । १० वटा भवनका ७७ वटा कोठामा आंशिक र आठ वटा कोठामा पूर्ण क्षति पुगेको छ । यहाँ रु १० करोड ६१ लाख बराबरको क्षति भएको छ ।
बेनिघाट रोराङ गाउँपालिकाको एउटा विद्यालयका दुई भवनका १२ वटा कोठा पूर्ण रूपमा क्षतिग्रस्त भएका छन् । उक्त विद्यालयमा रु ४ करोड १० लाख बराबरको क्षति भएको प्रतिवेदनमा उल्लेख छ ।
त्यस्तै, सिद्धलेक गाउँपालिकाको एउटा विद्यालयका चार भवनका १४ वटा कोठामा आंशिक क्षति पुगेको छ । यहाँ रु १ करोड ४३ लाख बराबरको क्षति भएको छ ।
प्रतिवेदनअनुसार विद्यालयमा रहेका शैक्षिक सामग्रीमा मात्रै रु २४ करोड ९३ लाख बराबरको क्षति भएको छ । बाढीबाट प्रभावित विद्यालय क्षेत्रको पुनरुत्थानका लागि रु ४ अर्ब २३ करोड ३५ लाख आवश्यक पर्ने आकलन गरिएको छ ।
सोमबार, भाद्र २९, २०८३
सोमबार, भाद्र २९, २०८३
