विराटनगर । कर्णाली र सुदूरपश्चिम प्रदेशमा विकसित पछिल्लो राजनीतिक परिस्थितिसँगै नेपाली कांग्रेस र नेकपा एमालेबीचको सत्ता साझेदारीमा खटपट सुरु भएको छ। बुधबार यी दुई प्रदेशको सत्ता समीकरणमा आएको फेरबदलको असर कोशी प्रदेशमा समेत देखिएको हो।

कांग्रेसले प्रदेश सरकारबाट एमालेसँगको समीकरण तोड्ने चर्चा चलिरहँदा बिहीबार बिहान ११ बजेका लागि पार्टी र सरकारबीच समन्वय गर्न बनेको संयन्त्रको आकस्मिक बैठक बोलाइएको छ। पार्टी कार्यालयमा बस्ने उक्त बैठकमा दलका नेता, उपनेता, प्रमुख सचेतक, सचेतक र पार्टीका महामन्त्री सहभागी हुने स्रोतले जनाएको छ।

बिज्ञापन

बैठकमा कोशी प्रदेशको सत्ता साझेदारी र पछिल्लो राजनीतिक घटनाक्रमबारे सघन छलफल हुनेछ। कार्यदलमा सिनियर नेताहरू अमृत अर्याल, गयानन्द मण्डल र सरकारको नेतृत्व गरिरहेका प्रदिप सुनुवार लगायतको उपस्थिति रहने बताइएको छ।

यस विषयमा प्रतिक्रिया दिँदै उपनेता हिमाल कार्कीले सुदूरपश्चिम र कर्णालीको राजनीतिक विकासक्रमपछि कोशीमा पनि हलचल भएको स्वीकार गरे। उनले बिहीबारको बैठकपछि कोशीको सत्ता यात्राबारे ठोस धारणा सार्वजनिक हुने र कोशीमा कसरी अगाडि बढ्ने भन्ने विषयमा ठोस निर्णय लिइने जानकारी दिए।

नेताहरूका अनुसार हालसम्म केन्द्रबाट कुनै औपचारिक निर्देशन नआए पनि कार्यदलको बैठकबाटै भरे रातिसम्म वा भोलिको बैठकपछि कोशीको सत्ता समीकरणबारे ठोस खाका तय हुने देखिन्छ।

×

❮

❯