विराटनगर । अहिले सर्वसाधारणलाई भारतीय बजारबाट एक सय रुपैयाँभन्दा बढी मूल्यका सरसामान ल्याउन रोक लगाइएको छ । तर, विराटनगरसँगै जोडिएको जोगबनी बजारमा कार्यालय समय सकिएपछि सरकारी गाडी लिएर खरिददारी गर्ने क्रम बढेको छ ।
यसै क्रममा बिहीबार साँझ पूर्वाधार विकास निर्देशनालय इटहरीका निर्देशक सुशील श्रेष्ठ प्रहरी चेकजाँच समेत छलेर भागेका थिए । जोगबनी सिमाना नजिकै प्रहरीले चेकजाँच गर्ने क्रममा त्यहाँ सुरक्षार्थ खटिएका ट्राफिक प्रहरी र नेपाल प्रहरी रोक्न भन्दाभन्दै गाडी को१झ ५८९ नम्बरको गाडी लिएर श्रेष्ठ फरार भएका हुन् । प्रहरीका अनुसार यसअघि पनि पटक पटक यो गाडी सरसामान खरिद गर्न जोगबनीसम्म लग्ने गरिएको थियो ।
विहीबार साँझ भने निर्देशक श्रेष्ठ केही कर्मचारीसाथै लिएर जोगबनी पुगेका थिए । तर, प्रहरीले गाडीमा भएको सरसमान चेकजाँच गर्न खोज्दा गाडी हुइँक्याएर भागेका थिए । पछि त्यो गाडीलाई प्रहरीले विराटनगरको रोडशेष चौक नजिकै रोकेको थियो ।
बिज्ञापन
त्यसक्रममा चालक मात्र गाडीमा थिए । निर्देशक श्रेष्ठसहितका कर्मचारी गाडीबाट ओर्लिएर अन्तै गएका थिए । गाडीमा प्रहरीले खानतलासी गर्दा कुर्तासलवार, सर्ट, चप्पल, बिस्कुट आदि बस्तु फेला परेको थियो । तर, श्रेष्ठ अन्य कर्मचारीलाई लिएर बीच बाटोमै ओर्लिएर गाडी छाडेर बेपत्ता भएका थिए ।
सिमानामा पत्रकारहरुले कार्यालय समय सकिएपछि किन सरकारी गाडी दुरुपयोग गर्दै भारतीय नाका पुगेको भनि प्रश्न सोध्दा उनले आफूहरुले पनि किनमेल गर्न पाउने बताएका थिए । पूर्वाधार विकास निर्देशनालय इटहरीका निर्देशक श्रेष्ठले आफू सिमानामा निर्माण हुँदै गरेको स्वागत द्वार हेर्न आएको र त्यहीबेला जोगबनीमा किनमेल गर्न गएको दाबी गरेका छन् ।
शुक्रबार, बैशाख २५, २०८३
शुक्रबार, बैशाख २५, २०८३
