काठमाडौं । संयुक्त अरब इमिरेट्स को विदेश मन्त्रालयले सरकारी तेल कम्पनीसँग सम्बन्धित एक ट्यांकरमाथि आक्रमण भएको जनाएको छ। फुजैराह तेल बन्दरगाह मा भएको उक्त आक्रमणपछि ठूलो आगलागी भएको र कम्तीमा तीन जना घाइते भएको अधिकारीहरूले बताएका छन्।
यूएईका अनुसार हवाई प्रतिरक्षा प्रणालीले १२ वटा ब्यालिस्टिक क्षेप्यास्त्र, तीन वटा क्रुज मिसाइल र चार वटा ड्रोन निष्क्रिय पारेको छ। घटनालाई ‘खतरनाक’ भन्दै यूएईले आवश्यक प्रतिक्रिया जनाउने अधिकार सुरक्षित राखेको पनि जनाएको छ।
बिज्ञापन
आक्रमणमा इरान को संलग्नता हुन सक्ने आशंका गरिएको छ। तर इरानी सरकारी माध्यममार्फत एक सैनिक अधिकारीले भने यूएईलाई निशाना बनाउने कुनै योजना नरहेको बताएका छन्।
घटनापछि अन्तर्राष्ट्रिय बजारमा कच्चा तेलको मूल्य प्रतिव्यारेल ११५ डलर नाघेको छ, जुन एकैदिनमा पाँच प्रतिशतभन्दा बढी वृद्धि हो।
फुजैराह यूएईको पूर्वी तटमा स्ट्रेट अफ होर्मुज बाहिर अवस्थित छ। अबुधाबीका तेल क्षेत्रबाट पाइपलाइनमार्फत त्यहाँ तेल पुर्याइने भएकाले होर्मुज अवरुद्ध भए पनि केही मात्रामा तेल निर्यात सम्भव रहने बताइएको छ।
यसैबीच दक्षिण कोरिया ले यूएई नजिकै रोकिएको आफ्नो एक जहाजमा विस्फोट भएको जनाएको छ। साथै ओमान को बुखा क्षेत्रमा आवासीय भवनमा आक्रमण हुँदा दुई जना घाइते भएका छन्।
छिमेकी कतार ले घटनाको निन्दा गर्दै जलमार्गहरू निर्बाध रूपमा सञ्चालन हुनुपर्ने माग गरेको छ।
यसबीच डोनाल्ड ट्रम्प ले ‘प्रोजेक्ट फ्रिडम’ अन्तर्गत संयुक्त राज्य अमेरिका ले स्ट्रेट अफ होर्मुजमा अलपत्र जहाजहरूलाई सुरक्षित बाहिर निकाल्ने तयारी गरेको बताएका छन्। त्यसलगत्तै अमेरिकाले सातवटा इरानी साना डुंगामाथि आक्रमण गरेको र एक अमेरिकी झण्डावाल जहाज सुरक्षित बाहिर निस्किएको जनाइएको छ।
ट्रम्पले विश्वका देशहरूसँग आफ्ना ‘निष्पक्ष र निर्दोष’ जहाजहरूलाई सुरक्षित मार्ग प्रदान गर्न सहयोग मागेका छन्। साथै, यस मानवीय प्रयासमा अवरोध भए बल प्रयोग गर्नेसम्मको चेतावनी पनि दिएका छन्।
मंगलबार, बैशाख २२, २०८३
मंगलबार, बैशाख २२, २०८३
