विराटनगर । पश्चिम एशियामा जारी युद्धका कारण इन्धन आपूर्तिबारे चिन्ता बढिरहेका बेला भारत सरकारले पनि ग्यासको आपूर्ति र प्रयोगमा सहजता अपनाउनु पर्ने स्पष्ट गरेको छ । भारतको पेट्रोलियम तथा प्राकृतिक ग्यास मन्त्रालयकी संयुक्त सचिव सुजाता शर्माले एलपी ग्यासको ढुवानी मार्गलाई लिएर सावधानी आवश्यक रहेको बताएकी हुन्।

हालै भएको अन्तर–मन्त्रालयीय ब्रीफिङमा शर्माले एलपी ग्यास आपूर्तिबारे चर्चा गर्दै भनिन्, “एलपीजी चिन्ताको विषय हो, किनकि आयात हुने ढुवानी जहाजहरू होर्मुज जलमार्ग हुँदै आउँछन्। तर पनि २५ हजार वितरकमध्ये कतै पनि स्टक सकिएको रिपोर्ट आएको छैन।”

पश्चिम एशियामा भइरहेको युद्धको सम्भावित प्रभावबारे बोल्दै उनले एलएनजी र एलपीजी दुवैको आपूर्ति हालसम्म सामान्य रहेको बताइन्। “एलएनजीको आपूर्तिमा कुनै कमी छैन। एलपीजीको पनि अभाव छैन,” उनले भनिन्।

शर्माले उपभोक्तालाई एलपीजीको विकल्प प्रयोग गर्न आग्रह गर्दै भनिन्, “जो उपभोक्ताले एलपीजीबाट पीएनजीमा सर्न सक्छन्, उनीहरूले तुरुन्तै त्यसो गर्नुपर्छ।”

उनका अनुसार करिब ६० लाख परिवार तत्कालै पीएनजीमा सर्न सक्ने अवस्थामा छन्। “सबैभन्दा महत्वपूर्ण कुरा हामीले घरेलु उपभोक्तालाई एलपीजी आपूर्ति गर्न सक्छौं कि सक्दैनौं भन्ने हो, र यसको उत्तर ‘सक्छौं’ भन्ने नै हो,” उनले थपिन्।

×

❮

❯