विराटनगर । कोशी प्रदेशका आर्थिक मामिला तथा योजनामन्त्री राम राना सवार गाडीले ११ वर्षीया बालिकालाई ठक्कर दिएको घटनामा पक्राउ परेका चालक चन्द्रनारायण चौधरीलाई प्रहरीले रिहा गरेको छ।

शनिबार बिहान ललितपुरको हरिसिद्धिस्थित घुम्तीमा चौधरीले चलाएको गाडीले बालिकालाई ठक्कर दिएको थियो। बालिका सामान्य घाइते भइ ग्वार्कोस्थित बीएन्डबी अस्पतालमा उपचारपछि डिस्चार्ज भइसकेकी छन्।

बिज्ञापन

ललितपुर प्रहरीले चालक चौधरीलाई घटनापछि तत्काल नियन्त्रणमा लिएको थियो। तर, कुनै लिखित उजुरी नआएको, बालिका डिस्चार्ज भइसकेको, र मन्त्री रानाले २५ हजार रुपैयाँ क्षतिपूर्ति दिएको आधारमा जिल्ला प्रहरी परिसर, ललितपुरले चालकलाई आइतबार रिहा गरेको जनाएको छ।

मन्त्री राना नेकपा एमालेको विधान महाधिवेशनमा सहभागी हुन गोदावरी जाँदै गर्दा दुर्घटना भएको हो। प्रत्यक्षदर्शीका अनुसार साँघुरो सडकमा गाडीले तीव्र गतिमा ठक्कर दिएर नरोकी अगाडि बढेको थियो। यसले सामाजिक सञ्जालमा आलोचना निम्त्याएको थियो।

विवादपछि एमालेले बालिकाको सम्पूर्ण उपचार खर्च व्यहोर्ने प्रतिबद्धता जनाएको छ।

×

❮

❯