विराटनगर। केही अघिमात्र मन्त्री र सचिवहरुलाई कोसीका मुख्यमन्त्री हिक्मत कुमार कार्कीले निर्देशन दिँदै भने ‘बजेट साउन लाग्नासाथ कार्यान्वयनमा लाग्नु होला । कुनै ढिलासुस्तीको गुन्जायस छैन ।’

मन्त्रीपरिषद्को निर्णय र बजेट कार्यान्वयनका विषयमा मुख्यमन्त्री कार्कीले दिएको निर्देशनबारे सरकारका प्रवक्ता, आन्तरिक मामिला तथा कानुन मन्त्री रेवतिरमण भण्डारीले संचारकर्मीहरुलाई जानकारी गराएका थिए । निर्देशन दिई रहने तर तिनको कार्यान्वयन भने नहुने कोसी प्रदेशको पुरानै चलन हो ।

बिज्ञापन

प्रदेशका पहिलो मुख्यमन्त्री शेरधन राईले पनि यसअघि नै कात्तिकबाटै बजेट पूर्णत कार्यान्वयनमा जाने भन्दै मन्त्री र कर्मचारीहरुलाई निर्देशन दिएका थिए । तर, उनको निर्देशन त्यसबेला कार्यान्वयन भएन । बजेट कार्यान्वयन हुने र बढी खर्च हुने महिनाबारे सर्वसाधारण जानकार नै छन् ।

मुख्यमन्त्री तथा मन्त्रिपरिषद्को कार्यालय विराटनगरमा आइतबार बसेको प्रदेश सुरक्षा समन्वय समितिको बैठकमा मुख्यमन्त्रीले प्रदेशको शान्ति सुरक्षाको अवस्था र विपद व्यवस्थापनको बारेमा छलफल गरे ।

बैठकमा प्रदेशमा अहिले देखिएका सुरक्षा चुनौती, गर्नुपर्ने काम र सीमा सुरक्षा लगायतका विषयमा छलफल भएको छ। लागू पदार्थ बेचबिखन, ओसारपोसार, रोकथाम साथै सडक सुशासनमा कार्ययोजना बनाएर काम गर्ने निर्णय गरिएकाे छ । सीमा क्षेत्रमा भइरहेको तस्करी नियन्त्रण लाई प्रभावकारी बनाएर काम गर्न बैठकमा मुख्यमन्त्री कार्कीले ‌अर्को निर्देशन दिए ।

बैठकमा मुख्यमन्त्री कार्कीले प्रदेशको विभिन्न जिल्लामा हुन लागिरहेको रथयात्रा साथै विराटनगरको रथयात्राको सुरक्षा प्रबन्धका बारेमा पनि चासो राखेका थिए । उनले चाडपर्वहरू नजिकिँदै आइरहेकोले कालोबजारी रोकथाम साथै बजार अनुगमनलाई पनि तीव्रता दिनुपर्नेमा जोड दिएको उनको निजी सचिवालयले प्रेषित गरेको समाचारमा जनाइएको छ ।

आन्तरिक मामिला तथा कानुन मन्त्रालयका उपसचिव कमल थापालाई उद्धृत गर्दै पठाइएको समाचारमा जनाइएअनुसार बैठकमा विपद, लागू पदार्थको रोकथाम, सडक सुशासन, सीमा क्षेत्रको तस्करी नियन्त्रणका बारेमा महत्वपूर्ण निर्णय भएका छन् ।

सुरक्षा समन्वय समितिको बैठकमा कोसी प्रदेशका सुरक्षा निकायका प्रमुख साथै मोरङ, सुनसरी र झापाका प्रमुख जिल्ला अधिकारीहरु सहभागी थिए ।

×

❮

❯