विराटनगर । कोसी प्रदेशका मुख्यमन्त्री हिक्मत कुमार कार्की र संयुक्त राष्ट्र संघीय खाद्य तथा कृषि संगठनको नेपाल तथा भुटान हेडलाइन्सका प्रतिनिधि केन सिमिजुबीच भेटघाट भएको छ । सोमबार यो खबर उनको निजी सचिवालयले संचार माध्यमहरुलाई पठाएर जानकारी गराएको हो ।
त्यस अवसरमा प्रदेश सरकारको पर्यटन, वन तथा वातावरण मन्त्रालयअन्तर्गतका परियोजनाहरू निकै सफल भएको उनले दाबी गरे । यसको संचालनमा योगदान पुर्याउनेलाई धन्यवाद दिए । मध्यपहाडी जिल्लाहरूमा वातावरणीय असर गर्ने बिरुवा लगाउन सके उच्च मूल्यका फलहरूको उत्पादन गर्न सकिने उनले बताए । यसलाई बजारमा लगेर बिक्री गर्ने कामको व्यवस्थापनमा थप सहयोग गर्न आग्रह गरे ।
विज्ञापन
मुख्यमन्त्री कार्कीले कृषि, जलवायु र विपदका क्षेत्रहरूमा सहकार्य गर्न सके ठूलो सफलता मिल्ने बताए । भने,‘‘हामीले जलवायु परिवर्तन र यसका असरहरूलाई ध्यानमा राख्दै कृषि उत्पादन र वातावरण संरक्षणमा कदम चाल्न आवश्यक छ ।’’ यो प्रदेशका हिमाल, पहाड र तराईको भौगोलिक विविधता युक्त भएको बताए । जैविक विविधता र प्राकृतिक पहिचानलाई ध्यानमा राख्नु पर्नेमा जोड दिए ।
यसबारे गम्भीर छलफल गर्नु पर्ने भन्दै सबै सरोकारवालासँग सहकार्य गर्न चाहेको सुनाए । आगामी वर्षको विश्व रामसार दिवसको अवसरमा जलवायु परिवर्तनका असरका बारेमा सम्मेलन आयोजना गर्ने पनि जनाए ।
‘‘हामीले जे काम गरिरहेका छौं, यसमा सहकार्य र समन्वयले ठूलो योगदान पुर्याउनेछ,’’ उनले भने ।
संयुक्त राष्ट्र संघीय खाद्य तथा कृषि संगठनका प्रतिनिधि केन सिमिजुले प्रदेश सरकारसँग सहकार्य गर्न तयार रहेको बताए। एउटा सम्पर्क कार्यालय खोल्ने योजना रहेको उनले सुनाए । संयुक्त राष्ट्र संघीय खाद्य तथा कृषि संगठनले कोसी प्रदेशमा जैविक विविधता, माटो संरक्षण, चुरे क्षेत्रमा वातावरणीय असर घटाउने महत्त्वपूर्ण परियोजनाहरूमा काम गरिरहेको बताइएको छ।
आइतबार, असोज ०४, २०८३
शनिबार, असोज ०३, २०८३
