धरान । धरान १६ मा श्रमदानका क्रममा १२ वर्षीया बालिकामाथि यौन दुर्व्यवहार गरेको आरोपमा ४९ वर्षीय खगेन्द्र राईलाई प्रहरीले पक्राउ गरेको छ। धरानका मेयर हर्क साम्पाङको नेतृत्वमा बहुभाषिक पाठशाला निर्माणको श्रमदान भइरहेको बेला बालिकामाथि दुर्व्यवहार भएको बताइएको छ। इलाका प्रहरी कार्यालय धरानका अनुसार पीडितका परिवारले दिएको किटानी जाहेरीपछि राई धरान–१७ पृथ्वीचोकबाट पक्राउ परेका हुन्। उनी श्रमदाताहरूको लागि खाना पकाउने जिम्मेवारीमा थिए।

बालिका आमासँगै श्रमदानमा पुगेकी थिइन्। आरोप अनुसार राईले बालिकालाई फकाएर खोला किनारतिर लगेर हातपात गर्ने प्रयास गरेका थिए। घटना भएको समयमा मेयर साम्पाङ भने त्यहाँ थिएनन्। घटनापछि पीडित आमाले राईमाथि कुटपिटसमेत गरेकी थिइन्।

बिज्ञापन

यो घटनालाई लुकाउन खोजिएको आरोप पनि लागिरहेको छ। पीडितका परिवारले अन्य दुई श्रमदाताहरू कुन्दन श्रेष्ठ र समीर तामाङमाथि पीडकलाई बचाउन सहयोग गरेको भन्दै किटानी जाहेरी दिएका छन्। श्रेष्ठले ‘बच्चीको बदनाम हुन्छ’ भन्दै घटना लुकाउन सुझाएको पीडित पक्षको आरोप छ।

यो घटना सुरुमा दबाइएको भए पनि धरान–१६ मा निर्माणाधीन प्रहरी चौकी भवनको विषयमा विवाद भएपछि बाहिरिएको हो। मेयर साम्पाङले प्रदेश सरकारको लगानीमा बनिरहेको चौकी भवन रोक्न पत्राचार गरेपछि समर्थकहरूले निर्माणस्थलमा ताला लगाए। त्यस क्रममा श्रमदानमा सहभागी स्थानीयहरूले आफूहरूलाई अन्याय भएको भन्दै यौन दुर्व्यवहारको विषय उठाएका थिए।

मेयर साम्पाङले भने दुई महिना पुरानो विषय अहिले मात्र बाहिर ल्याएर श्रमदान अभियानलाई बदनाम गर्न खोजिएको आरोप लगाएका छन्। फेसबुक स्टाटसमार्फत उनले दोषी प्रमाणित भए कारबाही गर्ने बताएका थिए। तर पछि त्यो स्टाटस हटाइयो। उनी पछिल्लो फेसबुक लाइभमार्फत बोलेका छन्, “दोषी पत्ता लागेमा कानूनी कारबाही होस्, तर वास्तविक श्रमदाताहरूलाई बदनाम नगरियोस्।” उनले यस्ता व्यक्तिहरूलाई श्रमदाता भन्न नमिल्ने समेत स्पष्ट पारे।

धरान १६ का वडाअध्यक्ष मुरारी भट्टराईले मेयरले आफ्नो अधिकार क्षेत्र बाहिर गएर कारबाहीको चेतावनी दिएको भन्दै आपत्ति जनाएका छन्। यता पीडित पक्षले मेयरकै प्रभावका कारण न्यायमा ढिलाइ भएको भन्दै प्रहरी समक्ष उजुरी दिएका छन्।

यो घटनाले श्रमदान कार्यक्रम, स्थानीय राजनीति, र पीडितको न्याय प्राप्तिको लडाइँलाई एकैसाथ जोडेर ठूलो बहस निम्त्याएको छ। अब दोषी को हो भन्नेबारे सत्यतथ्य छानबिन र निष्पक्ष कारबाही हुने अपेक्षा स्थानीयहरूले गरेका छन्।

×

❮

❯