कोशी प्रदेश

कोशीका दुई मन्त्री हतार-हतार मन्त्रालयमा: पद गुम्ने डर कि कामको चटारो?

नोट: यो समाचार ३ महिना अघिको हो

बिहिबार, साउन २१, २०८३ | साँझ ७:०३ बजे

Hamro Biratnagar News Channel ,कोशीका दुई मन्त्री हतार-हतार मन्त्रालयमा: पद गुम्ने डर कि कामको चटारो?, Biratnagar Top News Channel

लिङ्क कपी भएको छ ।

विराटनगर । कोशी प्रदेश सरकारका दुई मन्त्री बिहीबार अरू दिनको तुलनामा अलि फरक शैली र हतारोमा मन्त्रालय पुगेका छन्।

मुख्यमन्त्री हिक्मत कार्कीलाई पदबाट हटाउने हस्ताक्षर अभियानको नेतृत्व गरिरहेका आन्तरिक मामिला तथा कानुन मन्त्री इन्द्रमणि पराजुली र खानेपानी, सिँचाइ तथा ऊर्जामन्त्री तिलचन पाठक बिहीबार बिहानै मन्त्रालय पुगेका हुन्।

आफ्नै मुख्यमन्त्रीविरुद्ध निरन्तर लबिइङमा रहेका मन्त्री पराजुली बिहानै एकपटक मन्त्रालय पुगेर बाहिर निस्किएका थिए भने पछि पुनः फर्किएका थिए। यता मन्त्री पाठक पनि बिहान १० बजे नै मन्त्रालय हाजिर भइसकेका थिए।

दुवै मन्त्रीको यो अप्रत्यासित र हतारको उपस्थितिलाई लिएर मन्त्रालयका कर्मचारीहरू भने अचम्मित बनेका छन्। “मानौँ मन्त्रीको कुर्सीमा अरू नै कोही आइहाल्छ कि जस्तै गरी उहाँहरू आउनुभयो,” मन्त्रालयका एक कर्मचारीले भने, “मन्त्रालय छिर्नेबित्तिकै कर्मचारीहरूलाई ‘के-के काम बाँकी छ, छिटो-छिटो गरौँ’ भन्दै अलि फरक र हतारको शैलीमा प्रस्तुत हुनुभयो।”

मुख्यमन्त्री कार्कीलाई हटाउने खेलमा सक्रिय भूमिका खेलिरहेका मन्त्रीद्वयको यो अस्वाभाविक सक्रियता र हतारोलाई लिएर मन्त्रालय परिसरमा विभिन्न अड्कलबाजी सुरु भएको छ।