काठमाडौं। देशका विभिन्न भूभागमा आज मौसमको मिश्रित प्रभाव रहने भएको छ।

केही क्षेत्रमा वर्षा तथा हिमपातको सम्भावना रहँदा तराईका केही स्थानमा तातो हावाको प्रभाव कायम रहने मौसमविद्ले बताएका छन्।

विज्ञापन

जल तथा मौसम विज्ञान विभागका अनुसार दिउँसो कोसी प्रदेशसहित देशका हिमाली तथा पहाडी भूभागमा सामान्यदेखि आंशिक बदली रहनेछ भने तराई क्षेत्रमा आंशिक बदली रहने सम्भावना छ।

कोसी, वाग्मती, गण्डकी र लुम्बिनी प्रदेशका केही स्थान तथा मधेस, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित हल्कादेखि मध्यम वर्षा हुने सम्भावना रहेको विभागले जनाएको छ। उच्च हिमाली क्षेत्रमा हल्का हिमपातको सम्भावना पनि रहेको छ।

सुदूरपश्चिम प्रदेशको तराईका एक–दुई स्थानमा मेघगर्जन र चट्याङसहित मध्यम वर्षा हुन सक्ने पूर्वानुमान गरिएको छ। त्यस्तै, लुम्बिनी र सुदूरपश्चिम प्रदेशका तराईका केही स्थानमा तातो दिनको अवस्था रहने सम्भावना छ।

रातिको समयमा पनि देशभर सामान्यतया बदली रहने विभागको अनुमान छ। मधेस, कोसी, वाग्मती, गण्डकी र लुम्बिनी प्रदेशका पहाडी तथा तराई भूभागका केही स्थानमा तथा कर्णालीसहित सबै प्रदेशका हिमाली क्षेत्रमा मेघगर्जन, चट्याङसहित हल्कादेखि मध्यम वर्षा वा हिमपात हुन सक्ने बताइएको छ। सुदूरपश्चिम प्रदेशका पहाडी भूभागका थोरै स्थानमा पनि वर्षाको सम्भावना रहेको छ।

हाल नेपालमा उपल्लो वायुमण्डलमा रहेको पश्चिमी न्यूनचापीय रेखा तथा स्थानीय वायुको आंशिक प्रभावका कारण यस्तो मौसमीय अवस्था बनेको विभागले जनाएको छ।

×

❮

❯