काठमाडौं । इजरायल र इरानबीचको प्रत्यक्ष सैन्य भिडन्त तत्कालका लागि रोकिएको भए पनि क्षेत्रीय तनाव पूर्ण रूपमा समाप्त भएको छैन।
इरानले इजरायलले लेबनान तथा अन्य क्षेत्रमा आफ्नो आक्रामक गतिविधि जारी राखे पुनः सैन्य कारबाही गर्न सक्ने चेतावनी दिएको छ।
बिज्ञापन
इजरायलले बेरुत र इरानका विभिन्न क्षेत्रमा गरेको आक्रमणले अमेरिका–इरानबीच कायम युद्धविरामलाई जोखिममा पार्न सक्ने भन्दै अमेरिकी राष्ट्रपति डोनाल्ड ट्रम्पले इजरायली प्रधानमन्त्री बेन्जामिन नेतन्याहूलाई संयम अपनाउन आग्रह गरेका छन्।
अनलाइन समाचार माध्यम एक्सिओसका अनुसार ट्रम्पले आइतबार साँझ नेतन्याहूसँग टेलिफोन संवाद गर्दै थप सैन्य कारबाही नगर्न चेतावनी दिएका थिए। अमेरिकी अधिकारीहरूलाई उद्धृत गर्दै एक्सिओसले जनाएअनुसार ट्रम्पले इजरायललाई तनाव थप नबढाउन स्पष्ट सन्देश दिएका हुन्।
ट्रम्पले एक्सिओससँगको अन्तर्वार्तामा भनेका छन्, “मैले बीबी (नेतन्याहू)लाई सावधान रहन आग्रह गरेँ। अन्यथा, इजरायल चाँडै नै एक्लिन सक्ने अवस्था आउन सक्छ।”
इरानसँग सम्भावित सम्झौताको प्रयास जारी रहेको उल्लेख गर्दै ट्रम्पले थप आक्रमणहरू अनावश्यक हुन सक्ने बताएका थिए। निरन्तर बढ्दो तनावले इजरायलप्रतिको अमेरिकी समर्थन कमजोर हुन सक्ने चेतावनी पनि उनले दिएका थिए।
यद्यपि, नेतन्याहूले इरानी आक्रमणको जवाफ नदिँदा इजरायलको प्रतिरोध क्षमता कमजोर देखिने र त्यसले गलत सन्देश प्रवाह हुने तर्क गरेका थिए।
दुई नेताबीचको वार्ता इजरायलले आक्रमण रोक्ने कुनै स्पष्ट प्रतिबद्धता नजनाई समाप्त भएको थियो। त्यसपछि इजरायली अधिकारीहरूले अमेरिका समक्ष आफूहरू थप सैन्य कारबाहीका लागि तयार रहेको जानकारी गराएका थिए।
इजरायलले इरानको पेट्रोकेमिकल पूर्वाधारका केही हिस्सा तथा तेहरान आसपासका क्षेत्रलाई निशाना बनाएर आक्रमण गरेको थियो। त्यसको जवाफमा इरानले पनि मिसाइल प्रहार गरेको बताइएको छ।
अमेरिकी रक्षा अधिकारीहरूका अनुसार अमेरिकी सेना प्रत्यक्ष आक्रमणमा सहभागी नभए पनि इजरायलतर्फ लक्षित केही मिसाइल अवरोध गर्न सहयोग गरिरहेको थियो।
ट्रम्पले क्षेत्रका विभिन्न देशका नेताहरूले समेत इजरायललाई तनाव नबढाउन दबाब दिन आग्रह गरेको जानकारी दिएका छन्।
एक्सिओसका अनुसार इजरायलले सोमबार इरानका संवेदनशील लक्ष्यहरूविरुद्ध ठूलो आक्रमणको तयारी गरिरहेको थियो। त्यसबारे जानकारी पाएपछि ट्रम्पले पुनः नेतन्याहूसँग सम्पर्क गरी सैन्य कारबाही रोक्न आग्रह गरेका थिए।
वार्तापछि नेतन्याहूले इरानले तनाव नबढाएमा थप आक्रमण नगर्ने सहमति जनाएका थिए। त्यसलगत्तै उनले इजरायली सैन्य कमान्डरहरूलाई योजनाबद्ध केही आक्रमणहरू रद्द गर्न निर्देशन दिएको बताइएको छ।
सोमबार, जेठ २५, २०८३
मंगलबार, जेठ २६, २०८३
