विराटनगर । सरकारले आगामी आर्थिक वर्ष २०८३/८४ मा ऊर्जा क्षेत्रको पूर्वाधार विस्तार र जलविद्युत् आयोजना निर्माणलाई तीव्रता दिने घोषणा गरेको छ ।

अर्थमन्त्री स्वर्णिम वाग्ले ले शुक्रबार संसद्मा बजेट प्रस्तुत गर्दै निर्माणाधीन प्रसारण लाइन तथा सबस्टेशन सम्पन्न गर्न ७० अर्ब रुपैयाँ विनियोजन गरिएको जानकारी दिएका हुन् ।

विज्ञापन

सरकारले लगानी बोर्डमार्फत करिब ३ हजार मेगावाट क्षमताका आयोजना विकासका लागि आवश्यक सहजीकरण गर्ने जनाएको छ । आगामी वर्ष जलविद्युत् आयोजनाबाट ६७० मेगावाट र सौर्य आयोजनाबाट ३७० मेगावाट गरी कुल १ हजार ४० मेगावाट विद्युत् राष्ट्रिय प्रसारण लाइनमा थपिने बजेटमा उल्लेख छ । यससँगै देशको कुल जडित विद्युत् क्षमता ५ हजार ५ सय ३५ मेगावाट पुग्ने अनुमान गरिएको छ ।

सरकारले ४० मेगावाट क्षमताको राहुघाट जलविद्युत् आयोजना यसै वर्ष सम्पन्न गर्ने लक्ष्य लिएको छ । साथै तनहुँ जलाशययुक्त आयोजना, माथिल्लो मोदी ए, माथिल्लो मोदी, माथिल्लो त्रिशूली बी र बूढीगण्डकी आयोजनाको निर्माण कार्यलाई तीव्रता दिइने भएको छ ।

यस्तै, १ हजार ६१ मेगावाटको माथिल्लो अरुण, ८२८ मेगावाटको उत्तरगंगा, २१० मेगावाटको चैनपुर–सेती, ९९ मेगावाटको तामाकोशी तथा ७७ मेगावाटको घन्से खोला आयोजनाको वित्तीय व्यवस्थापन गरी ठेक्का प्रक्रिया अघि बढाइने सरकारको योजना छ ।

त्यसैगरी, ४१७ मेगावाटको नलगाड, ४९० मेगावाटको अरुणगाड र २८१ मेगावाटको नौमुरे आयोजनाको अध्ययन प्रक्रिया पनि अघि बढाइने बजेटमा उल्लेख गरिएको छ ।

×

❮

❯