काठमाडौं । पश्चिम एसियामा एक महिनादेखि जारी युद्धले विश्वव्यापी चिन्ता बढाएको छ । खाडी क्षेत्रमा तनाव अझै उच्च अवस्थामा रहँदा युद्ध ३०औँ दिनमा पुगेको छ ।
यसैबीच, अमेरिकाका विभिन्न भागमा शनिबार राष्ट्रपति डोनाल्ड ट्रम्पको इरानसम्बन्धी युद्ध नीतिविरुद्ध ‘नो किंग्स’ नामक प्रदर्शन भएको छ । लाखौँ नागरिक सहभागी उक्त प्रदर्शनमा ट्रम्प प्रशासनका नीति, बढ्दो महँगी तथा इरानसँगको युद्धविरुद्ध चर्को विरोध जनाइएको थियो ।
विज्ञापन
ठूला सहरदेखि साना नगरसम्म फैलिएको प्रदर्शनमा रिपब्लिकन र डेमोक्रेट दुवै पक्षका मानिसहरूको सहभागिता देखिएको थियो । प्रदर्शनकारीहरूले नारा लगाउँदै प्लेकार्ड प्रदर्शन गर्नुका साथै सांगीतिक प्रस्तुति र नृत्यमार्फत पनि आफ्ना मागहरू राखेका थिए ।
न्युयोर्क सिटीमा प्रदर्शनकारीहरू मिडटाउन म्यानहटनबाट मार्च गर्दै आप्रवासन नीति, ट्रम्प प्रशासन र इरान युद्धविरुद्ध आवाज उठाइरहेका थिए । सान फ्रान्सिस्कोमा एम्बार्काडेरो प्लाजाबाट सिभिक सेन्टरसम्म मार्च निकालिएको थियो, जहाँ विभिन्न सामाजिक आन्दोलनहरूको समर्थनमा ब्यानरहरू देखिएका थिए ।
त्यस्तै, मिनेसोटाको सेन्ट पलमा आयोजित ठूलो र्यालीमा रक गायक ब्रुस स्प्रिंगस्टीनले प्रस्तुति दिएका थिए । उनले मिनेसोटालाई देशकै लागि प्रेरणादायी उदाहरणको रूपमा चित्रण गर्दै जनवरीमा फेडरल इमिग्रेशन कारबाहीका क्रममा ज्यान गुमाएका व्यक्तिप्रति श्रद्धाञ्जली व्यक्त गरे । सो अवसरमा गभर्नर टिम वाल्जले संघीय आप्रवासन नीतिको आलोचना गर्दै स्थानीय समुदायको एकता र साहसको प्रशंसा गरे ।
अमेरिकामा ‘नो किंग्स’ आन्दोलनको यो तेस्रो चरण हो । यसअघि पनि गत वर्ष दुईपटक यस्ता प्रदर्शन भएका थिए, जसमा ठूलो जनसहभागिता देखिएको थियो । महँगी, इन्धन मूल्य वृद्धि र आर्थिक सुस्तता पनि यी प्रदर्शनका प्रमुख कारणका रूपमा रहेका छन् । यद्यपि, फ्लोरिडाको वेस्ट पाम बीचमा केही समर्थक र प्रदर्शनकारीबीच सामान्य मौखिक झडपसमेत भएको जनाइएको छ ।
आइतबार, असोज ०४, २०८३
शनिबार, असोज ०३, २०८३
