विराटनगर । पूर्वराष्ट्रपति विद्यादेवी भण्डारी नेकपा (एमाले) मोरङको जिल्ला पार्टी कार्यालय, पाञ्चाली विराटनगर जाने कार्यक्रम तय भएको सूचनापछि सामाजिक सञ्जालमा मंगलबार दिउँसो कार्यकर्ता भेला हुने प्रचार गरिएको थियो। तर, एमाले मोरङका इन्चार्ज पर्शुराम बस्नेतले सो प्रचारप्रति स्पष्ट खण्डन गर्दै पार्टीका कुनै पनि तहबाट कार्यक्रम तय नभएको बताएका छन्।

बस्नेतले सामाजिक सञ्जाल, फोन र मेसेजमार्फत भ्रमपूर्ण सूचना फैलाइएको जनाउँदै त्यसप्रकारको कुनै बैठक, छलफल वा कार्यकर्ता भेला नकेन्द्र, नप्रदेश, नजिल्ला तहबाट तय गरिएको जानकारी दिए। पार्टी कार्यालय वा विराटनगर महानगरभित्र कुनै औपचारिक कार्यक्रम नरहेको स्पष्ट गर्दै उनले नेता, कार्यकर्ता र समर्थकहरूलाई झुटा सूचनाप्रति नझुक्किन आग्रह गरे।

बिज्ञापन

पूर्वराष्ट्रपति भण्डारी सोमबार विराटनगर आइपुगेकी हुन्। उनले विमानस्थलमा सञ्चारकर्मीसँग कुरा गर्दै मोरङसँग आफ्नो पुरानो सम्बन्ध रहेको बताइन्। उनले मोरङबाटै पार्टी सदस्यता लिएको र आफ्नो विद्यार्थी जीवन महेन्द्र मोरङ क्याम्पसमा बितेको उल्लेख गरिन्। भण्डारीले आफ्नो राजनीतिक यात्रा पनि मोरङबाटै सुरु भएको बताएकी थिइन्।

×

❮

❯