काठमाडौं । यस वर्षको तिहारमा नेपाली फूलको कारोबार ५० करोड रुपैयाँभन्दा बढी पुगेको छ । भारतीय फूलको आयातमा गरिएको कडाइ र स्वदेशी उत्पादन बढेसँगै नेपाली फूलले बजारमा राम्रो हिस्सा ओगटेको हो ।
विगतका वर्षमा भारतीय फूलको आयातका कारण नेपाली किसानले उत्पादन गरेका फूलले पर्याप्त बजार पाउन सकेका थिएनन् । तर यस वर्ष सीमा क्षेत्रमा निगरानी बढाइएपछि स्वदेशी फूलको बिक्री बढेको छ ।
विज्ञापन
फ्लोरिकल्चर एसोसिएसन नेपाल (फ्यान) का अनुसार यस वर्ष तिहारमा सयपत्री र मखमली फूलको माग उच्च रहेको थियो । देशभर उत्पादित फूलले बजार पाउँदा किसान तथा व्यवसायी उत्साहित भएका छन् ।
यस वर्ष तिहारमा करिब ४५ देखि ५० लाख सयपत्री मालाको माग रहेको अनुमान गरिएको थियो । त्यस्तै, भाइटीकाका लागि करिब २ लाख मखमली मालाको माग रहेको थियो ।
नेपाली फूलको बजार विस्तारमा भारतीय फूलको अवैध आयात नियन्त्रणले महत्वपूर्ण भूमिका खेलेको व्यवसायीहरूको भनाइ छ । सीमा क्षेत्रमा प्रशासन र सुरक्षा निकायले निगरानी बढाएपछि भन्सार छलेर भित्रिने फूलको आयातमा कमी आएको थियो । यस क्रममा विराटनगरका कोल्डस्टोरमा छापा हानी भारतीय फूल बरामद गरिएको थियो । मोरङका अन्यक्षेत्रमा पनि छापा हानेर भारतबाट लुकाई छिपाई ल्याएको फूल नष्ट गरिएको थियो ।
त्यस्तै, काठमाडौं महानगरपालिकासहित विभिन्न स्थानीय तहले विदेशी फूल र प्लास्टिकका कृत्रिम मालाको बिक्रीमा कडाइ गरेका थिए । काठमाडौं महानगरले किसानलाई फूल बिक्रीका लागि ३० भन्दा बढी स्थान उपलब्ध गराएको थियो ।
यसले किसानलाई आफ्नो उत्पादन सिधै उपभोक्तासम्म पुर्याउन सहज बनाएको थियो । विगतमा बजार नपाएर बोटमै खेर जाने गरेका फूलले यसपटक राम्रो बजार पाएका छन् ।
नेपाली फूलको उत्पादन र बिक्री बढेसँगै तिहार स्वदेशी पुष्प व्यवसायका लागि उत्साहजनक बनेको छ । भारतीय फूलको आयात नियन्त्रण र आन्तरिक उत्पादनको प्रवर्द्धनले नेपाली फूल व्यवसायलाई थप बल पुगेको देखिन्छ ।
आइतबार, कार्तिक २२, २०८३
शुक्रबार, कार्तिक २०, २०८३
