काठमाण्डौ । सेयरबजारको ओरालो यात्रा आजपनि कायमै रहेको छ । आज नेपाल स्टक एक्सचेञ्ज (नेप्से)परिसूचक ०.९३ प्रतिशत अर्थात् २५.८१ अंकले घटेर २ हजार ७४४.४५ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.६५ प्रतिशतले घटेर ४६४.५१ विन्दुमा झरेको छ।
आज नेप्सेमा सूचीकृत ३५१ वटा स्क्रिप्टका १ करोड २१ लाख ४ हजार १७८ कित्ता सेयर किनबेच हुँदा कुल कारोबार रकम ४ अर्ब ९५ करोड ४६ लाख बढीको सेयर कारोबार भएको छ । अघिल्लो दिन भने ६ अर्ब ५३ करोड १७ लाख रुपैयाँ बढीको सेयर कारोबार भएको थियो ।
विज्ञापन
आजको बजारबारे अर्थशास्त्री सूर्यनारायण पौडेल भन्छन्, ‘पछिल्लो समय लगानीकर्ताहरुमा कन्फिडेन्ट नआउँदा सेयरबजार साइडवेजमा चलेको छ, र यतिबेला लगानीकर्ताहरु सस्तोमा सेयर बेच्न चाहिरहेका छैनन् । सरकारले पूँजीबजारको लागि नीतिगत कुराहरु गरेपनि कार्यान्वयन गर्ने वा लगानीकर्तालाई आश्वासन दिलाउने कार्य गर्न नसक्दा बजारप्रति उत्साहपन घट्दै गएको छ ।’
उनले थपे, ‘साथै अहिले बजार साइडवेजमा चल्नुको मुख्य कारण ठूला लगानीकर्ताहरु पर्ख र हेरको अवस्थामा रहनु पनि हो । जसरी सरकारले सम्पत्ति शुद्धीकरणको विषयले ठूला व्यवसायीमाथि अनुसन्धान गरी पक्राउ गरेका छन्, यसले नेपालको पूँजीबजारमा प्रत्यक्ष असर गरेको छ । साथै आइपीओ बिक्री गर्दा भएको चलखेलको विषयले पनि बजारलाई थप प्रभावित बनाएको छ । यतिबेला ठूला लगानीकर्ताहरु समस्यामा छन् र संस्थागत लगानीकर्ताहरुले समेत लगानी बढाउन सकिरहेका छैनन् । यदि सरकारले घोषणापत्रमा ल्याएका योजना तथा नीतिगत कार्यहरु कार्यान्वयनका लागि पहल गर्ने हो भने बजेट घोषणाअघि बजामा एउटा स्विङ आउन सक्ने सम्भावना देखिन्छ ।’
कुन समूहमा थपघट ?
आज कारोबारमा आएका १३ वटा समूहमध्ये एउटा ३ वटा बाहेक अन्य सबैमा रातो पोतियो । आज व्यापार समूह सर्वाधिक अर्थात १.०९ प्रतिशतले बढ्यो । यस्तै विकास बैंक र म्युचुअल फण्ड समूह पनि क्रमश ः०.१४ र ०.०१ प्रतिशतले बढ्यो ।
आज उत्पादन तथा प्रशोधन समूह सर्वाधिक अर्थात २.२४ प्रतिशतले घट्यो । यसैगरी बैंकिङ समूह ०.७६, फाइनान्स ०.६४, होटल १.६४, हाईड्रो १.४५, लगानी ०.६६, जीवन बीमा ०.८४, लघुवित्त ०.५४, निर्जीवन १.११ र अन्य समूह ०.९२ प्रतिशतले घट्यो ।
आइतबार, असोज ०४, २०८३
शनिबार, असोज ०३, २०८३
