विराटनगर । विराटनगरमा मंगलबार (आज) बाट सबै विद्यालयहरू संचालनमा आएका छन् । कतिपय विद्यालयहरु सोमबार खुलेका थिए ।

विद्यालयहरुले आजदेखि विद्यार्थीलाई विद्यालयमा बोलाएर विभिन्न शैक्षिक गतिविधि सुरु गरेका छन् । सरकारले वैशाख १५ गतेदेखि मात्र भर्ना अभियान सञ्चालन गर्न निर्देशन दिएको भए पनि लामो समय घरमै बस्दा विद्यार्थीहरूको पढ्ने बानीमा असर पर्ने चिन्तासहित विद्यालयहरूले आजैदेखि कार्यक्रम थालेका हुन् ।

विज्ञापन

प्याब्सन विराटनगरका अध्यक्ष अर्जुन श्रेष्ठका अनुसार विद्यार्थीलाई पुनः विद्यालयको वातावरणमा अभ्यस्त गराउन तथा उनीहरूको क्षमता विकासमा सहयोग पुग्ने उद्देश्यले सृजनात्मक क्रियाकलाप सुरु गरिएको हो ।

औपचारिक पठनपाठन भने वैशाख २१ गतेदेखि सुरु हुने जनाइएको छ । अभिभावकहरूको आग्रह र विद्यार्थीहरूको उत्साहलाई ध्यानमा राख्दै विद्यालयमा आजैदेखि चहलपहल बढाइएको श्रेष्ठले बताए ।

×

❮

❯