विराटनगर । खैरो हेरोइनसहित दुई जना पक्राउ परेका छन्।

हिजो वैशाख १४ गते दिउँसो करिब ३:३० बजे मोरङको विराटनगर महानगरपालिका–९ स्थित रानी सडक खण्डमा संयुक्त प्रहरी टोलीले उनीहरूलाई नियन्त्रणमा लिएको हो।

विज्ञापन

जिल्ला प्रहरी कार्यालय मोरङ र लागूऔषध नियन्त्रण ब्युरो विराटनगरबाट खटिएको टोलीले शंकास्पद अवस्थामा मोटरसाइकलमा रहेका दुई जनालाई जाँच गरेको थियो।

पक्राउ पर्नेमा भारत, बिहार राज्य अररिया जिल्ला जोगवनी थाना-१७ का ३० वर्षीय मोहम्मद अब्दुल्ला र मोरङ विराटनगर महानगरपालिका-१७ मटेरुवाका ३५ वर्षीय बाबु मियाँ रहेका छन्।

प्रहरीका अनुसार बाबु मियाँको साथबाट प्लास्टिक बाहेक १९१ ग्राम खैरो हेरोइनजस्तो देखिने पदार्थ बरामद गरिएको छ। उनीहरूलाई प्रयोग गरिएको प्र.१-०४००२ प ०७७२ नम्बरको मोटरसाइकलसहित नियन्त्रणमा लिइएको छ।

दुवैलाई जिल्ला प्रहरी कार्यालय मोरङमा राखी थप अनुसन्धान भइरहेको प्रहरीले जनाएको छ।

×

❮

❯