विराटनगर । कोसी प्रदेश मन्त्रिपरिषद् बैठकले विभिन्न निर्णय सार्वजनिक गरेको छ। तर निर्णय सार्वजनिक गर्ने क्रममा सरकारका प्रवक्ता तथा आन्तरिक मामिला तथा कानुन मन्त्री इन्द्रमणी पराजुलीले मिति नै त्रुटिपूर्ण रूपमा पढेपछि अन्योल सिर्जना भएको छ।

मन्त्री पराजुलीले ‘आयोजना बैंक सम्बन्धी कार्यविधि २०८२’ लाई ‘२०२८’ भनेर उल्लेख गरेपछि गलत सूचना प्रवाह भएको हो। यद्यपि, मुख्यमन्त्रीको निजी सचिवालयले पछि उक्त त्रुटि सच्याएको जनाएको छ। हतारमा टिपोट पढ्दा मिति उल्टो उल्लेख भएको बताइएको छ।

विज्ञापन

बिहीबार बसेको मन्त्रिपरिषद् बैठकले प्रदेश अनुसन्धान तथा प्रतिष्ठान ऐन, २०७९ लाई संशोधन गर्ने विधेयक प्रदेश सभामा पठाउन कानुन, न्याय तथा प्रदेश मामिला समितिमा पेश गर्ने निर्णय गरेको छ।

त्यस्तै, आयोजना छनोट तथा वर्गीकरण तथा आयोजना बैंक व्यवस्थापन सम्बन्धी कार्यविधि, २०८२ लाई मन्त्रिपरिषद्को आर्थिक, सामाजिक तथा पूर्वाधार समितिमा पठाउने निर्णय गरिएको छ।

चालु आर्थिक वर्षमा प्रदेशस्तरबाट कार्यान्वयन हुने समपुरक र विशेष अनुदानअन्तर्गतका आयोजना तथा कार्यक्रम राष्ट्रिय आयोजना आयोगको विद्युतीय प्रणालीमा प्रविष्ट गर्ने निर्णयसमेत गरिएको छ।

यसैगरी, ‘स्मुद ट्रान्जेक्सन’ कार्यान्वयनका लागि मुख्यमन्त्रीको संयोजकत्वमा समिति गठन गर्ने निर्णय भएको प्रवक्ता मन्त्री पराजुलीले जानकारी दिए।

×

❮

❯