विराटनगर । आगामी फागुन २१ गते हुने प्रतिनिधिसभा निर्वाचनका लागि उम्मेदवार टुंग्याउन नेकपा एमालेले केन्द्रीय सचिवालय बैठक बोलाएको छ।

पार्टीको प्रचार तथा प्रकाशन विभागका संयोजक मीनबहादुर शाहीका अनुसार सचिवालय बैठक शनिबार माघ ३ गते दिउँसो १ बजे पार्टी केन्द्रीय कार्यालयमा बस्नेछ। निर्वाचन कार्यतालिकाअनुसार माघ ६ गते १६५ वटै निर्वाचन क्षेत्रमा उम्मेदवारी मनोनयन हुने भएकाले एमालेले सो बैठकमार्फत उम्मेदवारको नामावलीलाई अन्तिम रूप दिन लागेको हो।

बिज्ञापन

एमालेका निर्वाचन क्षेत्रीय समन्वय समिति, जिल्ला तथा प्रदेश कमिटीहरूले यसअघि नै उम्मेदवारका नाम सिफारिस गरिसकेका छन्। सिफारिस सूचीमा अध्यक्ष केपी शर्मा ओलीसहित करिब ३५ जना नेताको नाम एकल रूपमा परेको छ।

हालसम्म कुनै पनि दलसँग चुनावी गठबन्धन गर्ने निर्णय नभएकाले एमालेले सबै निर्वाचन क्षेत्रमा सूर्य चिह्नअन्तर्गत उम्मेदवार अघि सार्ने जनाएको छ।

दुर्गम क्षेत्रका उम्मेदवारहरूलाई निर्वाचन क्षेत्रमा पुग्न र मनोनयनको तयारी गर्न समय लाग्ने भएकाले सचिवालय बैठकमार्फत समयमै उम्मेदवारी टुंग्याउन लागिएको शाहीले बताए। यसअघि केन्द्रीय कमिटीको दोस्रो बैठकले उम्मेदवार चयनको जिम्मेवारी सचिवालयलाई दिएको थियो।

×

❮

❯