मौसमविद्को पूर्वानुमान, दशैंमा ‘भीषण’ पानी पर्ने सम्भावना धेरै
मंगलबार, असोज १४, २०८२ |
बिहान ११:०७ बजे
काठमाडौं । मौसमविद्ले अब ‘भारी’ वर्षाको सम्भावना औँल्याएका छन् ।
पोहर साल असोजको जस्तै ‘भीषण’ पानी पर्ने सम्भावना धेरै रहेको त्रिभुवन विश्वविद्यालयको जल तथा मौसम विज्ञान विषयका सहप्राध्यापक डा. विनोद पोखरेलले उल्लेख गरेका छन् ।
बिज्ञापन
“फोरकास्ट (पूर्वानुमान) नमिलोस् भनेर अझै कामना गरौँ,” उनले मंगलबार (असोज १४) बिहान फेसबुकमा लेखेका छन्, “तर, पोहोर सालको असोजको जस्तै भीषण पानी पर्ने सम्भावना धेरै छ ।”
उनले देशमा यही अक्टोबर ३ देखि ७ (असोज १७–२१)सम्म भारी वर्षा हुन सक्ने जनाएका छन् । हाल तीन मोडेलले उक्त अवधिमा भारी वर्षा हुने देखाएको उनले स्पष्ट पारेका छन् । उनले यसअघि पनि यस्तो सम्भावना औँल्याएका थिए ।
“भोलि (असोज १५)देखि वर्षा हल्का/मध्यम हुँदै बिहीबार (असोज १६) रातिदेखि पूर्वी नेपालमा भारी वर्षा सुरु हुने देखिन्छ,” उनले लेखेका छन् ।
उनले बडादसैँको टीकापछि यात्रा गर्दा विशेष ध्यान दिन सचेत गराएका छन् । भारी वर्षा तीन–चार दिनसम्म हुने देखिएको उनले जनाएका छन् । हिले दसैँ हुने उनको भनाइ छ ।
जलवायुविज्ञ डा. धर्मराज उप्रेतीले पनि दसैँ टीकाको भोलिपल्ट (असोज १७)देखि पूर्वी नेपालबाट भारी वर्षा गराउने प्रणाली विकास हुँदै गरेको जनाएका छन् ।
कुनै स्थानमा २४ घण्टामा ५० देखि १०० मिलिमिटरसम्म पानी पर्नुलाई ‘भारी’ वर्षा भनिन्छ । १० देखि ५० मिलिमिटरसम्म पानी परे ‘मध्यम’ वर्षा भनिन्छ । १० मिलिमिटरसम्म पानी परे ‘हल्का’ वर्षा भनिने मौसम पूर्वानुमान महाशाखाले जनाएको छ ।
कुनै स्थानमा २४ घण्टामा १०० देखि २०० मिलिमिटर पानी पर्नुलाई ‘धेरै भारी’ वर्षा भनिन्छ । २४ घण्टामा २०० मिलिमिटरभन्दा धेरै पानी परे ‘अति भारी’ वर्षा भनिने महाशाखाले जनाएको छ ।
गत वर्ष असोज १० देखि १३ गतेसम्म देशमा ठूलो पानी परेको थियो । कतिपय स्थानमा ‘रेकर्ड ब्रेक’ वर्षा भएको थियो । काठमाडौंसहित धेरै स्थानमा बाढीपहिरोबाट ठूलो क्षति भएको थियो ।
मंगलबार, असोज २१, २०८२
मंगलबार, असोज २१, २०८२
