विराटनगर।विराटनगर–१० सनसारीमाईस्थानस्थित भीमसेन मन्दिर सेवा समितिको आयोजनामा शनिबार भव्य रूपमा भीमसेन जात्रा सम्पन्न भएको छ।
परम्परागत नेवारी संस्कृतिको महत्वपूर्ण धार्मिक तथा सांस्कृतिक धरोहर मानिने यो जात्रा प्रत्येक वर्ष इन्द्रजात्राको अवसरमा विराटनगरमा निकालिँदै आएको छ ।
बिज्ञापन
मन्दिर परिसरमा आयोजित औपचारिक कार्यक्रममा विराटनगर महानगरपालिकाकी उपप्रमुख शिल्पा निरला कार्कीले भीमसेनको मूर्तिमा पूजापाठ गरी जात्राको उद्घाटन गरिन्। त्यसपछि सुरु भएको झाँकीसहितको भीमसेनजात्रा ट्राफिकचोक, महेन्द्रचोक, शनिमन्दिर, भृकुटीचोक, डिएसपी रोड हुँदै अतिथिसदन, जलजलाचोक, बुधहाटचोक, रेम्बो गल्ली पार गर्दै पुनः सुनसारी माईस्थानमा पुगी सम्पन्न भएको थियो।
कार्यक्रमलाई सम्बोधन गर्दै उपप्रमुख कार्कीले नेपाललाई बहुभाषिक, बहुसांस्कृतिक र बहुधार्मिक मुलुकका रूपमा चिनाउँदै मौलिक कला र संस्कृतिको संरक्षण सबैको जिम्मेवारी भएको बताइन्।
उनले आर्थिक दृष्टिले नेपाल अझै कमजोर भए पनि सांस्कृतिक विविधता र ऐतिहासिक सम्पदाका कारण नेपाल विश्वमै धनी मुलुकको रूपमा चिनिन सक्ने क्षमता रहेको उल्लेख गरिन्।
“नेवारी संस्कृति नेपालको धरोहर हो। यसले नेपाललाई अन्तर्राष्ट्रिय स्तरमा चिनाएको छ। विराटनगरमा निकालिने भीमसेनजात्रा पनि यसैको एउटा महत्वपूर्ण प्रतीक हो,” उनले भनिन्।
उनले जात्रालाई निरन्तरता दिन तथा मन्दिरको संरचना निर्माणमा महानगरपालिकाले सक्दो सहयोग गर्ने प्रतिबद्धता समेत जनाइन्।
भीमसेन मन्दिर व्यवस्थापन समितिका उपाध्यक्ष तथा कार्यक्रम संयोजक संजय श्रेष्ठका अनुसार यसपटक जात्रामा मोरङका विभिन्न स्थानमा बसोबास गर्ने नेवारी समुदायको सहभागिता विगतका वर्षभन्दा झनै बढेको छ। “परारभन्दा पोहोर, र पोहोरभन्दा यसपटक झनै भव्य रूपमा जात्रा सम्पन्न भएको छ,” उनले बताए।
त्यसैगरी समितिका महासचिव भविसकुमार श्रेष्ठले भीमसेनजात्राले नयाँ पुस्तालाई आफ्नो मौलिक भाषा, कला र संस्कृतिप्रति आकर्षित गर्न मद्दत गर्ने विश्वास व्यक्त गरे। उनले पछिल्लो समय नेपाली समाजमा पाश्चात्य संस्कृतिको प्रभाव बढ्दै गएको भन्दै भीमसेनजात्राजस्ता मौलिक संस्कृतिले युवापुस्तालाई आफ्नै परम्परा र मूल्यप्रति सचेत बनाउन भूमिका खेल्ने बताए।
“हाम्रो संस्कृति नै हाम्रो पहिचान हो। त्यसलाई जोगाउनु प्रत्येक समुदायको जिम्मेवारी हो,” उनले जोड दिए।
समितिका अध्यक्ष सुरेश श्रेष्ठले पनि नेवार समुदायको मौलिक संस्कृति र परम्पराको संरक्षणमा समिति निरन्तर सक्रिय रहेको जानकारी दिए।
शनिबार, भाद्र २१, २०८२
शनिबार, भाद्र २१, २०८२
