भद्रपुर । देशको प्रमुख भन्सार नाकामध्ये एक मानिने भद्रपुर भन्सार कार्यालय अहिले सुनसान छ। दशैं, तिहारजस्ता मुख्य चाडपर्वको पूर्वसन्ध्यामा व्यापारी तथा मजदुरको भीड रहने यो नाका अहिले कर्मचारी फुर्सदिलो, मजदुर समय कटाउन भन्सारभित्र गफगाफमा व्यस्त देखिन्छन्।
भन्सार क्षेत्र विगतमा भारतबाट लत्ताकपडा आयातको प्रमुख केन्द्र मानिन्थ्यो। तर, पछिल्लो समय चोरी–तस्करी बढ्नु र व्यापारीको आकर्षण घट्नुले यो नाका ओझेलमा पर्दै गएको छ।
बिज्ञापन
एक मजदुरले भने, “विगतमा दशैं आउने तीन महिना अघिदेखि भन्सार चहलपहलले भरिपूर्ण हुन्थ्यो। अहिले हातमुख जोर्न पनि गाह्रो छ।” उनीहरू भन्छन्, “व्यापारी आउँदैनन्, सामान आउँदैन, काम पनि हुँदैन।”
भन्सार प्रमुख अजन प्रसाद सिटौला भन्छन्, “२०७३/०७४ सालमा मेची भन्सारबाट सरेर भद्रपुरमा आउँदा यस्तो स्थिति देखिएको थिएन। अहिले गोदामहरू खाली छन्। व्यापारीहरू देखिँदैनन्। राजश्व असुलीमा समेत ठूलो गिरावट आएको छ।”
राजश्व संकलनको तथ्यांक हेर्दा पछिल्ला ४ वर्षमा ठूलो गिरावट देखिएको छ:
आ.व. २०७८/०७९ – २४ करोड १३ लाख
आ.व. २०७९/०८० – ९ करोड ४७ लाख
आ.व. २०८०/०८१ – २४ करोड ३४ लाख
आ.व. २०८१/०८२ (हालसम्म) – २० करोड ४६ लाख
साउनदेखि कात्तिकसम्मका चार चाडपर्व महिना भन्सार राजश्व असुलीमा विशेष महत्वपूर्ण मानिन्छ। तर, यो वर्ष ती महिनामा असुली घटेको देखिन्छ।
२०८० सालको असोज – ३ करोड ९१ लाख
२०८१ सालको असोज – १ करोड १२ लाख मात्र
चोरी–तस्करीको बढ्दो प्रवृत्ति, व्यापारीको उदासीनता र सरकारी अनुगमनको कमजोरीले गर्दा भद्रपुर भन्सारको सक्रियता कम हुँदै गएको छ। यदि यस्ता गतिविधिमा नियन्त्रण लिइएन भने भन्सार क्षेत्रको आर्थिक गतिविधिमा गम्भीर असर पर्न सक्ने देखिन्छ।
शनिबार, भाद्र १४, २०८२
शनिबार, भाद्र १४, २०८२
