झापा । झापाको ग्रामीण क्षेत्रमा विद्युत्को असुरक्षित प्रयोगका कारण करेन्ट लागेर हुने मृत्युको घटना बढेको छ । जिल्लामा गएको साउनमा मात्र करेन्ट लागेर पाँचजनाले ज्यान गुमाए ।

जिल्ला प्रहरी कार्यालयका सूचना अधिकारी खगेन्द्रबहादुर खड्काका अनुसार, पछिल्लो चार महिनामा झापामा करेन्ट लागेर १० जनाको मृत्यु भएको छ । ज्यान गुमाउने अधिकांश विद्युत्सम्बन्धी पर्याप्त प्राविधिक ज्ञानको अभाव भएका ग्रामीण क्षेत्रका बासिन्दा छन् ।

बिज्ञापन

यसका अधिकांश मृत्युको घटना मोटरबाट पानी तान्ने, खोलामा करेन्ट लगाएर माछा मार्ने र कुटी काट्ने क्रममा भएको पाइएको उनले बताए ।

अधिकांश मानिसमा विद्युतीय मोटर कसरी चलाउने भन्ने राम्रो ज्ञान छैन । अपूर्ण ज्ञान र सतर्कताको कमीका कारण करेन्ट लागेर मानिसले अकालमै मृत्युवरण गरिरहेका छन् । प्रहरीका अनुसार, आर्थिक वर्ष २०८१/८२ मा झापामा करेन्ट लागेर १५ जनाको ज्यान गएको छ ।

यसैबीच, करेन्ट लागेर मेचीनगर नगरपालिका–५ का २२ वर्षीय सन्दीप राजवंशीको मृत्यु भएको छ । घरमा बिग्रिएको टेबल पंखा मर्मत गर्ने क्रममा सोमबार (भदौ २) साँझ करेन्ट लागेर अचेत भएका राजवंशीलाई उपचारका निम्ति मेची आम्दा अस्पताल धुलाबारीमा पुर्‍याइएको थियो । उपचारका क्रममा राति उनको मृत्यु भएको प्रहरीले जनाएको छ ।

×

❮

❯