विराटनगर । कोशी प्रदेश सरकार अन्तर्गतको भौतिक पूर्वाधार विकास मन्त्रालयको निर्देशनालय मातहत रहेको पूर्वाधार विकास कार्यालय, सुनसरीको औपचारिक उद्घाटन बिहीबार इनरुवामा सम्पन्न भएको छ। प्रदेश सरकारको कामलाई प्रत्यक्ष रूपमा जनतालाई महसुस गराउने उद्देश्यसहित प्रदेशका १४ वटै जिल्लामा पूर्वाधार विकास कार्यालय स्थापना गरिएको हो ।

मुख्यमन्त्री हिक्मत कुमार कार्कीको प्रमुख आतिथ्यमा सम्पन्न उद्घाटन समारोहमा प्रदेशसभा सदस्य, मन्त्रालयका अधिकारी तथा स्थानीय सरोकारवालाहरूको सहभागिता थियो।

प्रदेश सरकारले आगामी आर्थिक वर्षका नीति तथा कार्यक्रमअन्तर्गत जिल्लागत रूपमा पूर्वाधार विकास कार्यालय विस्तार गर्ने योजना सार्वजनिक गरेको थियो। सोहीअनुसार सुनसरीमा स्थापना गरिएको यो कार्यालयले पूर्वाधार निर्माण तथा विकास कार्यलाई तीव्र, प्रभावकारी र विकेन्द्रीकृत रूपमा अगाडि बढाउने अपेक्षा गरिएको छ।

कार्यक्रममा मुख्यमन्त्री कार्कीले प्रदेशको विकास योजनाहरूलाई समयमै कार्यान्वयन गर्ने प्रतिबद्धता व्यक्त गर्दै पारदर्शिता र गुणस्तरमा कुनै सम्झौता नगर्ने बताएका थिए। उनले नयाँ संरचनाले स्थानीय तहसँग समन्वय गरेर परियोजना कार्यान्वयनमा सघाउ पुर्‍याउने विश्वाससमेत व्यक्त गरे।

×

❮

❯