काठमाडौं : नेप्से सूचक मंगलबार ३५.७३ विन्दुले घटेको छ । यससँगै सूचक २६५८.९३ अंकमा आएको छ ।
६ अर्ब ६७ करोड रुपैयाँभन्दा बढीको सेयर कारोबार भएको छ । २ कम्पनीमा सकारात्मक सर्किट लागेको छ ।
बिज्ञापन
वाणिज्य बैंक समूहको सूचक घट्दा समग्र सूचक बढी प्रभावित भएको देखिन्छ ।सकारात्मक खबरहरुका बाबजुत पनि सेयर बजारमा भने अझै उत्साह देखिन सकेको छैन । बजेट र मौद्रिक नीतिपछि बजार बढ्ने अपेक्षामा बसेका लगानीकर्ता पुनः निरुत्साहित भएका भन् ।
मौद्रिक नीतिमार्फत सेयर बजारलाई फाइदा पुग्ने कदम चालिएको थियो भने बजेटमा कुनै पनि नकारात्मक हुने विषय ल्याइएको थिएन ।यति हुँदा पनि नेप्से भने झन् तल झरेको छ । यसबाट आम लगानीकर्ता थप अन्योल र आश्चर्यमा परेका छन् । नीतिनियममा सहजीकरण गरिएको अवस्था छ । ब्याजदर निरन्तर घटेको छ । वित्तीय प्रणालीमा अधिक पैसा छ । सेयर मूल्य सस्तो छ ।
यसरी एकपछि अर्को गुड न्यूजहरु आइरहँदा पनि बजार किन बढ्न सकेन भन्ने प्रश्न लगानीकर्ताहरुको मनमा तेर्सिएको अवस्था देखिन्छ ।तर केही जानकारहरुका अनुसार ठूला र संस्थागत लगानीकर्ताले आक्रामक ढंगले कारोबार नगरेकाले बजारले गति लिन नसकेको हो ।
बजारका लागि एकपछि अर्को सकारात्मक खबरहरु आइरहेका बेला संस्थागत तथा केही ठूला लगानीकर्ताहरुले भने योजनाबद्ध रुपमा तर निकै सुस्त गतिमा मात्र सेयर एकुमुलेसन गरिरहेको ब्रोकरहरुको भनाई छ ।
‘ठूला लगानीकर्ताहरुले सकेसम्म सस्तो मूल्यमा किन्ने रणनीति अनुसार काम गरिहेको देखिन्छ । यसबाट डिमान्ड पक्ष खासै मजबुत हुन सकेको छैन’, एक ब्रोकरले भने । तर यही बेला बजार बढ्नुको सट्टा झन् ओरालो लागेपछि कतिपय सर्वसाधारण र नयाँ लगानीकर्ताले आत्तिएर सेयर बिक्री गरेको पाइएको ब्रोकरहरु बताउँछन् ।त्यसो त यसरी बजार घट्नुपर्ने खास कारण देखिएको छैन ।
नयाँ बजेटले पुँजी बजारलाई प्रत्यक्ष प्रभावित हुने गरी करसम्बन्धी कुनै पनि विषय चलाएको छैन । विशेषगरी संस्थागत र ठूला लगानीकर्ताहरुको सक्रिय सहभागिताबिना सेयर बजारले फराकिलो वृद्धि हासिल गर्न गाह्रो हुन्छ ।
साना लगानीकर्ताले २–४ सय कित्ता कारोबार गरेका भरमा बजार गतिशील हुन सक्दैन ।यद्यपि, मौद्रिक नीतिको तेस्रो त्रैमासिक समीक्षामार्फत सेयर धितो कर्जाको जोखिमभार घटाइएको छ । यसकारण अब बैंकहरु सेयर कर्जा प्रवाहमा थप उत्साहित हुने अवस्था बनेको छ ।
जोखिमभार कम भएपछि सेयर धितो कर्जाको ब्याजदर थप सस्तो हुने भएकाले ठूला लगानीकर्ताहरु कर्जा लिन उत्साहित हुने देखिएको छ ।
सेयर कर्जा बढ्र्दै जाँदा सेयर बजारमा माग पनि बढ्ने र त्यसले समग्र सूचकलाई माथि लैजान सहयोग गर्ने भए पनि अहिलेसम्म व्यवहारमा भने त्यसो हुन सकेको छैन ।
सेयर बजारमा लगानीकर्ताको धैर्ययताको निकै ठूलो महत्व हुन्छ । कहिलेकाँही लामो समयसम्म बजार नबढ्ने भएकाले सकेसम्म वित्तीय अवस्था मजबुत भएका कम्पनीहरु किनेर होल्ड गर्न सक्ने क्षमता आम लगानीकर्तासँग हुनुपर्छ ।
आत्तिएर प्यानिक सेल गर्दा झन् घाटा व्यहोर्नुपर्ने अवस्था आउन सक्छ ।बजारमा माग पक्ष सबल बनाउनका लागि नयाँ लगानीकर्ता भित्रिनुपर्छ ।
लगानीकर्ताको मनोबल उच्च हुने कार्यक्रम आउनुपर्छ । संस्थागत लगानीकर्ताको बलियो उपस्थिति हुन जरुरी देखिन्छ ।कम्पनीहरुको मुनाफा र लाभांश वितरण क्षमता पनि बढ्दै जानुपर्छ । लगानीकर्ताले पनि सबल वित्तीय सूचक भएका कम्पनीहरु छान्न सक्नुपर्छ ।
यति हुन सकेकमा बजारले विस्तारै सकारात्मक बाटो समाउन सक्ने जानकारहरु बताउन्ँछन् ।यस दिन ३ सय १५ कम्पनीको १ करोड ५५ लाखभन्दा बढी कित्ता सेयर कारोबार भएको छ । ६० करोड रुपैयाँभन्दा बढीसहित कारोबार रकममा राधी हाइड्रोपावर अग्रस्थानमा रहेको छ । यसैगरी, दोस्रो र तेस्रो स्थानमा क्रमशः युनिभर्सल पावर कम्पनी र ङादी ग्रुप पावर परेका छन् ।
बुधबार, जेठ २१, २०८२
