काठमाडौं । विनाशकारी बाढीका कारण क्षतिग्रस्त नेपाल–चीन सीमा जोड्ने केरुङ नाकातर्फको सडक चीनले करिब एक सातामै पुनः सञ्चालनमा ल्याएको छ।
अगस्ट २६ मा आएको बाढीपछि चीनको तिब्बत स्वायत्त क्षेत्रस्थित केरुङ नाकासम्म पुग्ने राष्ट्रिय राजमार्गका विभिन्न खण्डमा ठूलो क्षति पुगेको थियो। सडक अवरुद्ध भएपछि प्रभावित क्षेत्रमा भारी उपकरण, उद्धार सामग्री तथा जनशक्ति स्थलमार्गबाट पुर्याउन कठिनाइ भएको थियो।
विज्ञापन
रोयटर्सका अनुसार चीनले सेप्टेम्बर २ सम्ममा केरुङ सीमा नाकातर्फ जाने मुख्य सडक पुनः सञ्चालनमा ल्याएको हो। सडक खुलेसँगै यसअघि हवाईमार्गबाट पठाउनुपर्ने उद्धार सामग्री तथा उपकरण स्थलमार्गबाटै प्रभावित क्षेत्रमा पुर्याउन सहज भएको छ।
१५८ उद्धारकर्मी र ३३ उपकरण परिचालन
सडक पुनःस्थापनाका लागि चीनले १५८ जना उद्धार तथा प्राविधिक जनशक्ति परिचालन गरेको थियो। चीनको आपत्कालीन व्यवस्थापन मन्त्रालयका अनुसार चाइना एन्नेङ समूहका उद्धारकर्मीसहित एक्स्काभेटर, लोडरलगायत ३३ वटा भारी उपकरण प्रयोग गरिएको थियो।
लगातारको वर्षा, तीव्र पानीको बहाव, साँघुरो पहाडी भूभाग र पहिरोको जोखिमबीच सडक मर्मतको काम अघि बढाइएको थियो। सेप्टेम्बर १ सम्म सडक खुलाउन करिब ८०० मिटर भाग बाँकी थियो। त्यसको भोलिपल्ट सडक पूर्ण रूपमा सञ्चालनमा ल्याइएको हो।
सडक खुलेपछि भारी निर्माण उपकरण, उद्धार टोली, जीवन पत्ता लगाउने उपकरण तथा तालिमप्राप्त कुकुरसहितका खोज तथा उद्धार टोली प्रभावित क्षेत्रमा पुग्न थालेका छन्।
सीमा क्षेत्रमा पूर्वाधारमा व्यापक क्षति
बाढीका कारण केरुङ–रसुवागढी सीमा क्षेत्रमा सडक, विद्युत्, सञ्चारलगायत भौतिक पूर्वाधारमा व्यापक क्षति पुगेको थियो। चीनतर्फ सडक अवरुद्ध भएपछि केही उद्धार सामग्री तथा उपकरण हवाईमार्गबाट प्रभावित क्षेत्रमा पठाइएको थियो।
चीनतर्फ सडक पहुँच पुनःस्थापित भए पनि नेपालतर्फ रसुवागढी तथा स्याफ्रुबेँसी आसपासका सडक र अन्य पूर्वाधारमा भएको क्षतिका कारण दुई देशबीचको आवागमन तत्काल पूर्ण रूपमा पूर्ववत् हुने अवस्था छैन।
नेपालतर्फका क्षतिग्रस्त सडक तथा सीमा पूर्वाधार पुनःस्थापना भएपछि मात्रै केरुङ–रसुवागढी नाकाबाट नियमित व्यापारिक तथा यात्रु आवागमन सहज हुने अपेक्षा गरिएको छ।
बुधबार, भाद्र १७, २०८३
बिहिबार, भाद्र १८, २०८३
