विराटनगर । साउन १० गते सुनसरीको देवानगञ्ज गाउँपालिका–३ कप्तानगञ्ज क्षेत्रमा दुई समुदायबीच भएको विवादका क्रममा घाइते भएका एक युवकको उपचारका क्रममा मंगलबार मृत्यु भएको छ। यससँगै उक्त घटनामा ज्यान गुमाउनेको संख्या चार पुगेको छ।

जिल्ला प्रहरी परिसर काठमाडौंका एसएसपी दिलीप घिमिरेका अनुसार २२ वर्षीय रवीन्द्र मेहेताको त्रिभुवन विश्वविद्यालय शिक्षण अस्पताल, महाराजगञ्जमा उपचारका क्रममा मंगलबार निधन भएको हो। घटनामा घाइते भएका अर्का एक जनाको वीर अस्पतालमा उपचार भइरहेको प्रहरीले जनाएको छ।

बिज्ञापन

साउन १० गते दुई समुदायबीच भएको झडपपछि स्थिति तनावग्रस्त बनेको थियो। अवस्था नियन्त्रणमा लिन सुरक्षाकर्मी परिचालन गरिएको थियो। त्यसक्रममा भएको हिंसात्मक घटनामा सुनसरीका ओमप्रकाश मेहेता र जयप्रकाश मेहेताको मृत्यु भएको थियो। त्यसैगरी सिरहामा भएको प्रदर्शनका क्रममा गणेश यादवको पनि ज्यान गएको थियो।

रवीन्द्र मेहेताको उपचारकै क्रममा मृत्यु भएपछि उक्त आन्दोलन तथा सामुदायिक विवादसँग सम्बन्धित घटनामा मृत्यु हुनेको संख्या चार पुगेको छ।

सरकारले घटनाबारे छानबिन अघि बढाएको जनाएको छ भने स्थानीय प्रशासनले सामाजिक सद्भाव कायम राख्न सबै पक्षलाई संयमित हुन आग्रह गरेको छ।

×

❮

❯