कोलम्बो । कोलम्बोमा शुक्रबार सम्पन्न टी-२० विश्वकप अन्तर्गतको खेलमा जिम्बावेले अष्ट्रेलियामाथि २३ रनको सनसनीपूर्ण जित निकाल्दै प्रतियोगिताकै ठूलो उलटफेरमध्ये एक दर्ता गरेको छ।
१७० रनको लक्ष्य पछ्याएको अष्ट्रेलियाले नियमित अन्तरालमा विकेट गुमाउँदै दबाब झेल्नुपर्यो। ओपनर जोस इङ्ग्लिस (८) र कार्यवाहक कप्तान ट्राभिस हेड (१७) ले १.१ ओभरमा १३ रन जोडेका थिए, तर ब्लेसिङ मुजारबानीले इङ्ग्लिसलाई आउट गर्दै सुरुआती झट्का दिए। स्कोर २५ हुँदा पहिलो विकेट गुमाएको अष्ट्रेलियाले २९ रनमै हेडलाई पनि गुमायो। मुजारबानी र ब्राड इभान्सले समान दुई–दुई विकेट लिए।
बिज्ञापन
अष्ट्रेलियालाई ग्लेन म्याक्सवेलको विशेष प्रदर्शनको अभाव खड्कियो। म्याक्सवेल ३२ बलमा ३१ रन बनाएर आउट भए। उनले म्याट रेन्शासँग पाँचौं विकेटका लागि ७६ रनको साझेदारी गरेका थिए। रेन्शाले ६५ रनको साहसी पारी खेले पनि स्टोइनिस (६) र ड्वार्शुइस (६) ले साथ दिन सकेनन्। अन्ततः अष्ट्रेलिया १७० रनको लक्ष्य पार गर्न नसकी २३ रनले पराजित भयो।
मुजारबानीले चार ओभरमा १७ रन खर्चेर ४ विकेट लिए भने ब्राड इभान्सले २३ रनमा ३ विकेट लिए।
यसअघि टस हारेर ब्याटिङमा उत्रिएको जिम्बावेका ओपनर ब्रायन बेनेट र टाडिवानाशे मरुमानीले तीव्र सुरुआत गर्दै ७.१ ओभरमा ६१ रन जोडे। मरुमानी (३५) मार्कस स्टोइनिसद्वारा आउट भए। त्यसपछि बेनेट र रायन बर्ल (३५) ले दोस्रो विकेटका लागि ७० रनको साझेदारी गरे, जुन टी–२० विश्वकपमा जिम्बावेको दोस्रो विकेटका लागि सबैभन्दा ठूलो साझेदारी हो। यसअघि मसाकाद्जा र टेलरबीच ६२ रनको कीर्तिमान थियो।
बेनेटले अर्धशतक पूरा गरे। बर्ल आउट भएपछि बेनेट (६४) र सिकन्दर रजा (२५) ले अन्त्यतिर ३८ रन थप्दै टोलीलाई १६० रन पार गराए।
यसअघि अष्ट्रेलियाका कार्यवाहक कप्तान ट्राभिस हेडले टस जितेर पहिले बलिङ रोजेका थिए। दुवै टोलीले अघिल्लो खेलको तुलनामा दुई–दुई परिवर्तन गरेका थिए। अष्ट्रेलियाबाट बेन ड्वार्शुइस र टिम डेभिड टोलीमा आएका थिए भने जिम्बावेबाट टोनी मुन्योङ्गा र ग्रेम क्रेमर समावेश भएका थिए।
मिचेल मार्श दोस्रो खेल पनि गुमाए
अष्ट्रेलियाका नियमित कप्तान मिचेल मार्श आन्तरिक अण्डकोषीय रक्तस्रावका कारण पुनः अनुपस्थित रहे। प्रशिक्षणका क्रममा चोट लागेपछि उनी अझै पुनःस्थापनाको क्रममा छन्। कोलम्बोमा हेडले टोलीको नेतृत्व गरेका थिए।
मार्शले आयरल्याण्डविरुद्धको खेल पनि गुमाएका थिए र उनको स्थानमा स्टिभ स्मिथलाई बोलाइएको थियो। स्मिथ अझै कोलम्बो नपुगेको हेडले टसका क्रममा बताएका थिए।
अष्ट्रेलिया यसअघि नै प्याट कमिन्स र जोस हेजलवुडजस्ता तीव्र गतिका बलरहरू चोटका कारण गुमाइसकेको छ।
बिहिबार, बैशाख ०३, २०८३
बिहिबार, बैशाख ०३, २०८३
