विराटनगर ।नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जेनजीले सुरु गरेको आन्दोलन शासकीय असफलता र भ्रष्टाचारविरुद्धको न्यायोचित आन्दोलन भएको बताउँदै त्यसलाई संविधानसम्मत तरिकाबाट समाधान गर्नुपर्नेमा जोड दिएका छन् ।

प्रचण्डले आज वक्तव्य जारी गरी आन्दोलनमा सहादत प्राप्त युवाप्रति श्रद्धाञ्जली र घाइतेहरूको शीघ्र स्वास्थ्यलाभको कामनासहित सरकारले गरेको दमनको भर्त्सना गरेका छन् । उनले भने, ‘जनताले उठाएका आवाजलाई सुन्नुको साटो दमन गर्ने सरकारकै कारण ठूलो मानवीय क्षति भयो ।’

बिज्ञापन

उनले आन्दोलनको दोस्रो दिन तोडफोड, आगजनी र लुटपाटजस्ता घटनाहरूमा ‘अवाञ्छित तत्वहरूको घुसपैठ’ भएको आरोप लगाएका छन् । त्यस्ता गतिविधि आन्दोलनको आदर्श र उद्देश्यविपरीत भएको भन्दै उनले उच्चस्तरीय न्यायिक छानबिनको माग गरे ।

प्रचण्डले लोकतन्त्र र संविधानलाई प्रतिस्थापन गर्ने प्रयासको विरोध गरेका छन् । उनले वक्तव्यमा भनेका छन्, ‘लोकतन्त्रको विकल्प अझै बलियो लोकतन्त्र हो, गणतन्त्रको विकल्प अझ सबल गणतन्त्र हो ।’ उनले प्रत्यक्ष कार्यकारी रहने निर्वाचन प्रणाली र भ्रष्टाचार नियन्त्रणका लागि शक्तिशाली आयोग गठनजस्ता संवैधानिक सुधार आवश्यक रहेको पनि उल्लेख गरेका छन् ।

माओवादी केन्द्र परिवर्तनविरोधी शक्तिसँग उस्तै नभएको दाबीसहित प्रचण्डले भने, ‘हामी यथास्थितिमा बस्न चाहन्नौँ, नयाँ र राम्रो गर्नेहरूसँग हातेमालो गर्न तयार छौँ ।’

×

❮

❯