काठमाडौं — संवैधानिक निकायमा नियुक्त ५२ पदाधिकारीबारे सर्वोच्च अदालतले आज (बुधबार) निर्णय सुनाउने तयारी गरे पनि मिति सारिएको छ। अब असार १८ गते फैसला सुनाइनेछ।

प्रधान न्यायाधीश प्रकाशमान सिंह राउतसहित पाँच न्यायाधीशको इजलास आज अपराह्नसम्म छलफलमा जुटेपनि निर्णय दिन नसकिएको सर्वोच्च अदालतका प्रवक्ता अच्युत कुइँकेलले जानकारी दिए। उनका अनुसार निर्णय अध्ययनकै क्रममा रहेकाले असार १८ मा सुनाउने तय भएको हो।

तत्कालीन प्रधानमन्त्री केपी शर्मा ओली नेतृत्वको सरकारले अध्यादेशमार्फत् संविधान परिषद् सम्बन्धी ऐन संशोधन गरी अख्तियार, निर्वाचन आयोगलगायतका संवैधानिक निकायमा नियुक्ति गरेको थियो। यसविरुद्ध वरिष्ठ अधिवक्ता ओमप्रकाश अर्याल, दिनेश त्रिपाठीलगायतले रिट दायर गरेका थिए।

ओली सरकारले २०७७ मंसिर ३० गते पहिलोपटक ३२ जना र २०७८ असार १० मा दोस्रोपटक २० जनालाई संवैधानिक पदमा नियुक्त गरेको थियो। परिषद् बैठकमा ओली, तत्कालीन प्रधानन्यायाधीश र राष्ट्रियसभा अध्यक्ष मात्र सहभागी थिए।

विवादित नियुक्तिबारे अन्तिम निर्णय आउन अब एक साता कुर्नुपर्ने भएको छ।

×

❮

❯