विराटनगर । कटहरीस्थित पेट्रोल पम्प, जग्गा र भौतिक संरचना कब्जा गरेको आरोपमा पक्राउ परेका आपराधिक पृष्ठभूमिका अभिषेक गिरी सोमबार रिहा भएका छन्।
सरकारी वकिल कार्यालय मोरङमा जाहेरवालासँग लेनदेन विवाद मिलेपछि दुवै पक्षबीच औपचारिक मिलापत्र भएको हो।
के थियो घटना?
मोरङको कटहरी गाउँपालिका–४ मा दिलिपकुमार चौधरी र दिनेश ठाकुरको संयुक्त स्वामित्वमा रहेको रु. ४ करोड मूल्य बराबरको पेट्रोल पम्प व्यवसायमा आर्थिक समस्या आएपछि उनीहरूले बिक्री गर्ने निर्णय गरेका थिए। सो समयमा मोरङ कारागारमा कैद भुक्तान गरिरहेका गिरीले चौधरीलाई कारागारमै बोलाएर भेटेका थिए।
बिज्ञापन
त्यसपछि गिरी र उनकी दिदी अर्पणा तुलाधर गिरीले चौधरीलाई विश्वासमा पारी थोरै रकम मात्र दिएर अनेक जालझेल र षड्यन्त्रपूर्वक उक्त सम्पूर्ण सम्पत्ति हडपेर दिदीको नाममा गराएको आरोप लागेको थियो। चौधरीले दिएको किटानी जाहेरीका आधारमा प्रहरीले गिरीलाई पक्राउ गरी आपराधिक विश्वासघात तथा ठगीसम्बन्धी कसुरमा अनुसन्धान अघि बढाएको थियो।
मिलापत्र र वर्तमान स्थिति
जिल्ला न्यायाधिवक्ता लेखनाथ ढकालका अनुसार सोमबार दुई पक्षबीच २० लाख रुपैयाँ लेनदेन भई हिसाबकिताब चुक्ता भएको छ। जाहेरवाला चौधरीले कुनै कारोबार बाँकी नरहेको र मुद्दा अघि बढाउनु नपर्ने जनाएपछि सरकारी वकिल कार्यालयमै मिलापत्र गराइएको हो।
मिलापत्रसँगै पेट्रोल पम्प हडपेको मुद्दा साम्य भए तापनि गिरीविरुद्ध कारागार प्रशासन र कैदीबन्दीको भत्तासँग जोडिएका अन्य प्रकरणमा भने प्रहरी अनुसन्धान अझै जारी रहेको ढकालले जानकारी दिएका छन्।
सोमबार, साउन २५, २०८३
सोमबार, साउन २५, २०८३
