विराटनगर । फिफा विश्वकप २०२६ को नकआउट चरणका रोमाञ्चक खेलहरू सकिएसँगै क्वाटरफाइनलको समीकरण पूरा भएको छ। विश्वकपको प्रतिष्ठा जोगाउन साविक विजेता अर्जेन्टिना र उपविजेता फ्रान्ससहित युरोप र अफ्रिकाका आठ बलिया टोलीहरू मैदानमा बाँकी रहेका छन्।
यस पटकको क्वाटरफाइनलमा पुराना चिरपरिचित प्रतिद्वन्द्वीहरू आमनेसामने हुँदैछन् भने केही टोलीहरू दशकौँ लामो खडेरी तोड्दै अन्तिम आठमा आइपुगेका छन्।
बिज्ञापन
क्वाटरफाइनलका रोचक र बहुप्रतीक्षित भिडन्तहरूको विवरण यस प्रकार छ:
१. फ्रान्स विरुद्ध मोरक्को: कतार विश्वकपको ‘रिम्याच’
खेलको मिति र समय: जुलाई १०, बिहान ०१:४५ बजे
सन् २०२२ को कतार विश्वकप सेमिफाइनलमा भिडेका फ्रान्स र मोरक्को यसपटक क्वाटरफाइनलमै आमनेसामने हुँदैछन्। चार वर्षअघि फ्रान्सले मोरक्कोलाई २-० ले रोक्दै फाइनलको यात्रा तय गरेको थियो। अफ्रिकी पावरहाउस मोरक्को यसपटक फ्रान्ससँग पुरानो हारको बदला लिँदै सेमिफाइनल पुग्ने दाउमा छ भने फ्रान्स आफ्नो बलियो साख जोगाउन उत्रनेछ।
२. स्पेन विरुद्ध बेल्जियम: युरोपियन महारथीहरूको प्रतिष्ठाको लडाइँ
खेलको मिति र समय: जुलाई ११, बिहान ००:४५ बजे
दोस्रो क्वाटरफाइनलमा दुई बलिया युरोपियन टोलीहरू स्पेन र बेल्जियमबीच महाभिडन्त हुनेछ। सन् २०१० को विश्वविजेता स्पेन लामो पर्खाइ अर्थात् १६ वर्षपछि विश्वकपको क्वाटरफाइनलमा पुगेको हो। उता, सन् २०१८ को सेमिफाइनलिस्ट बेल्जियम पनि ८ वर्षपछि यो चरणमा फर्किएको छ। दुवै टोलीका लागि यो खेल आफ्नो पुरानो गौरव फर्काउने सुनौलो अवसर हुनेछ।
३. इंग्ल्यान्ड विरुद्ध नर्वे: ऐतिहासिक मोड र जादुमयी यात्रा
खेलको मिति र समय: जुलाई १२, बिहान ०२:४५ बजे
तेस्रो क्वाटरफाइनल खेलमा फुटबल इतिहासकै एक रोचक मोड देखिनेछ। २८ वर्षपछि विश्वकपमा पुनरागमन गर्दै बलियो ब्राजिललाई समेत पाखा लगाएर सनसनी मच्चाएको नर्वे पहिलो पटक क्वाटरफाइनल पुगेको हो। ऐतिहासिक रूपमा बलियो नर्वेको सामना सन् १९६६ को विजेता इंग्ल्यान्डसँग हुनेछ, जो आफ्नो ६ दशक लामो उपाधि खडेरी तोड्ने लक्ष्यमा छ।
४. अर्जेन्टिना विरुद्ध स्विट्जरल्यान्ड: उपाधि रक्षाको अभियान र इतिहास रच्ने दाउ
खेलको मिति र समय: जुलाई १२, बिहान ०६:४५ बजे
अन्तिम क्वाटरफाइनलमा साविक विजेता अर्जेन्टिना र स्विट्जरल्यान्ड भिड्दैछन्। ६४ वर्षपछि विश्वकपको उपाधि लगातार रक्षा गर्ने पहिलो टोली बन्ने दाउमा कप्तान लियोनेल मेसीको अर्जेन्टिना रहेको छ।
अर्कातर्फ, स्विट्जरल्यान्ड ७२ वर्षको लामो पर्खाइपछि पहिलो पटक सेमिफाइनलमा प्रवेश गर्दै नयाँ इतिहास रच्ने कडा रणनीतिसहित मैदान उत्रनेछ।
बुधबार, असार २४, २०८३
आइतबार, असार २१, २०८३
