काठमाडौं । ठगी तथा सम्पत्ति शुद्धीकरण मुद्दाकी आरोपित टिकटकर तुल्सा अधिकारीलाई थाइल्याण्डबाट पक्राउ गरी नेपाल ल्याइएको छ।

ललितपुर प्रहरीका एसपी गौतम मिश्रका अनुसार अधिकारी हाल प्रहरी हिरासतमा रहेकी छन्। उनीविरुद्ध ६ करोड ५२ लाख २९ हजार ७५ रुपैयाँ बराबरको ठगी तथा सम्पत्ति शुद्धीकरणको मुद्दा दर्ता भएको थियो।

विज्ञापन

प्रहरी अनुसन्धानका क्रममा उनी विदेश फरार भएको खुलेपछि अन्तर्राष्ट्रिय प्रहरी संगठन (इन्टरपोल) मार्फत रेड नोटिस जारी गरिएको थियो। त्यसपछि उनलाई थाइल्याण्डमा पक्राउ गरी नेपाल ल्याइएको हो।

अधिकारीविरुद्ध गत साउनमा प्रहरी वृत्त सातदोबाटोमा ठगी तथा आपराधिक विश्वासघात सम्बन्धी उजुरी परेको थियो। अनुसन्धानका क्रममा उनको बैंक खातामा ठूलो परिमाणमा आर्थिक कारोबार भएको भेटिएपछि सम्पत्ति शुद्धीकरणतर्फ पनि अनुसन्धान विस्तार गरिएको थियो।

सातदोबाटोस्थित ‘हाम्रो अटोमोबाइल्स’ का सञ्चालक कुमार चिमोरियाले अधिकारीविरुद्ध जाहेरी दिएका थिए। उजुरी परेपछि उनी फरार रहेकी थिइन्।

×

❮

❯