विराटनगर । सुनसरीको हरिनगर गाउँपालिका–६ घुस्कीमा सोमबार राति एक १८ वर्षीया किशोरीको गोली हानी हत्या गरिएको छ। उनीमाथि आफ्नै भिनाजुले गोली प्रहार गरेका हुन् ।

सुनसरीका प्रहरी प्रमुख एसपी सुमनकुमार तिम्सिनाका अनुसार मृतक किशोरीको नाम अर्सी खातुन रहेको छ। उनलाई राति करिब १ बजेतिर टाउकोमा गोली हानी हत्या गरिएको हो। प्रारम्भिक अनुसन्धानअनुसार हत्यामा भारतको पूर्णिया जिल्ला, पत्राहा पञ्चायत–१६ घुर्नाका २९ वर्षीय आजात मिया जट संलग्न रहेको बताइएको छ।

आजात मिया किशोरीका भिनाजु रहेको र उनले नै कटुवा पेस्तोल प्रयोग गरी हत्या गरेको आशंका गरिएको छ। घटनापछि मिया फरार छन् भने प्रहरी टोली उनको खोजीमा खटिएको छ। एसपी तिम्सिनाले मिया भारततिर भागेको आशंका गरिएको बताए ।

घटनास्थलबाट एक गोलीको खोका फेला परेको प्रहरीले जनाएको छ।

घटना भएको क्षेत्र भारतीय सीमावर्ती नजिकै पर्छ, जसले अनुसन्धानमा थप चुनौती थपिएको जनाइएको छ। हत्या किन र कसरी भयो भन्नेबारे थप अनुसन्धान भइरहेको प्रहरीले जनाएको छ।

×

❮

❯