विराटनगर । मूल्य अभिवृद्धि कर (भ्याट) छलीको अभियोगमा विराटनगरका एक प्रतिष्ठित हार्डवेयर व्यवसायी सौरभ कुमार बियानीलाई कारागार चलान गरिएको छ।

‘न्यू सौरभ ट्रेडिङ्ग’ तथा ‘बियानी एण्ड ब्रदर्स हार्डवेयर एण्ड मार्वल’का प्रोप्राइटर बियानीले १ अर्ब ३१ करोड ६४ लाख रुपैयाँभन्दा बढी राजस्व छली गरेको आन्तरिक राजस्व कार्यालय, विराटनगरको आरोप छ।

कार्यालयले २०८२ साल असार १६ गते बियानीको नाममा थुनुवा पुर्जी जारी गरेको थियो। कर अधिकृत भवानीप्रसाद दाहालद्वारा हस्ताक्षरित सो पत्रमा बियानीले मूल्य अभिवृद्धि कर ऐन, २०५२ अनुसार कर छली गरेको ठहर उल्लेख गरिएको छ।

अनुसन्धानका क्रममा बियानीले कुल १ अर्ब ३१ करोड ६४ लाख ९८ हजार ५८४ रुपैयाँ बराबरको कर छली गरेको देखिएको छ। सो रकम बराबरको नगद धरौटी वा सम्पत्ति जमानत बुझाउन नसकेपछि कार्यालयले भ्याट ऐनको दफा २३(घ) अनुसार अर्को आदेश नभएसम्मका लागि उनलाई थुनामा राख्न मोरङ कारागार कार्यालयमा पत्राचार गरेको हो।

×

❮

❯