रंगेली । मोरङको रंगेली नगरपालिकाले नीति तथा कार्यक्रम कार्यान्वयन गर्न पुस्तिकामा बजेटका शीर्षगत अंक र रकम नै नखुलाई नगरसभामा पेपेश गरेको छ । मंगलबार उपमेयर भुमा पराजुलीले बजेट पेश गरेकी थिइन ।

पराजुलीले आगामी आर्थिक वर्ष आर्थिक वर्ष २०८२/०८३ का लागि ल्याएको ९६ करोड ४० लाख रुपैयाँको बजेट सार्वजनिक गरिन । बजेट पुस्तिकामा नयाँ उल्लेखित कार्यक्रमका लागि के कति बजेट विनियोजन गरिएको भन्ने उल्लेख छैन । नगरपालिकाले चालू आर्थिक वर्षमा गरिरहेका कामको विवरणको फेहरिस्त भने बजेटमा राखेको छ । तर, आगामी आर्थिक वर्षको कुल विनियोजन समेत बजेट पुस्तिकामा राखिएको छेन । बुधबार सम्पन्न बाह्रौँ नगरसभाबाट सर्वसम्मत पारित भएको छ ।

बिज्ञापन

नगर उपप्रमुख भूमा पराजुलीले नगरसभामा प्रस्तुत गरेको बजेट विवरणअनुसार चालु खर्चतर्फ ४८ करोड ८१ लाख रुपैयाँ, पूँजीगततर्फ २४ करोड ५९ लाख रुपैयाँ र सामाजिक सुरक्षा भत्तातर्फ २३ करोड रुपैयाँ विनियोजन गरिएको छ । चालु खर्चमा रंगेली अस्पतालको व्यवस्थापन, किसानको सिँचाइ मिटर बिल भुक्तानी, सडक बत्तीको विल, अति विपन्नको निःशुल्क बीमा, शिक्षक, कर्मचारी र महिला स्वास्थ्य स्वयंसेविकाको पारिश्रमिक जस्ता खर्च समावेश छन्।

विभागगत रूपमा हेर्दा आर्थिक विकासमा ४१ करोड १६ लाख रुपैयाँ, सामाजिक विकासमा १२ करोड २ लाख रुपैयाँ, पूर्वाधारमा २२ करोड १ लाख रुपैयाँ, उद्योग क्षेत्रमा २८ लाख रुपैयाँ बजेट छुट्याइएको छ। सञ्चार तथा सूचना प्रविधिमा ९७ लाख ५० हजार, सुशासनमा ७२ लाख, विपद् व्यवस्थापनमा ७० लाख र प्रशासनिक खर्चतर्फ ३१ करोड रु.पैयाँ विनियोजन गरिएको छ ।

नगरसभामा बजेटमाथि छलफलपछि सबै सदस्यको सहमतिमा पारित गरिएको हो । कार्यक्रममा उत्कृष्ट शिक्षक, कर्मचारी र सञ्चारकर्मीहरूलाई सम्मान समेत गरिएको थियो ।

बजेट पारित भएपछि मेयर दिलिप बगडीयाले चालु अवस्थाका बहुवर्षीय योजना, कृषि, शिक्षा र स्वास्थ्यलाई प्रमुख प्राथमिकतामा राखेर बजेट बनाइएको जानकारी दिए। “हामी योजनाका नाममा योजना हालेर होइन, अधुरा योजनालाई पूर्णता दिने उद्देश्यसहित अघि बढेका छौँ,“ उनले भने ।

स्थानीय तहमा कार्यान्वयन हुने बजेटका योजनाहरू प्रभावकारी रुपमा लागू गर्नुपर्ने चुनौती रहे पनि नगरपालिकाले यो वर्षका लागि व्यवहारिक प्राथमिकताहरूलाई केन्द्रमा राखेर बजेट सार्वजनिक गरेको छ ।

×

❮

❯