विराटनगर । कोशी राजमार्ग अन्तर्गत धनकुटा नगरपालिका–९ च्याङच्याङबारीमा शुक्रबार दिउँसो एक यात्रुवाहक बस दुर्घटना हुँदा ११ जना घाइते भएका छन्। संखुवासभाबाट धरानतर्फ जाँदै गरेको को १ ख ७७८८ नम्बरको बस दिउँसो करिब २:४० बजे अनियन्त्रित भई सडकमा पल्टिएको जिल्ला प्रहरी कार्यालय धनकुटाले जनाएको छ।
करिब १५ जना यात्रु सवार उक्त बस दुर्घटना भएको खबर पाउनासाथ मुलघाट प्रहरी चौकीबाट प्रहरी वरिष्ठ नायब निरीक्षक हरिकुमार राई र जिल्ला प्रहरी कार्यालय धनकुटाबाट प्रहरी निरीक्षक रामप्रसाद खनालको नेतृत्वमा टोली खटिएको थियो। प्रहरी र स्थानीयको सक्रियतामा घाइतेहरूको तत्काल उद्धार गरी उपचारका लागि स्थानीय स्वास्थ्य संस्थामा पठाइएको छ।
बिज्ञापन
घाइतेहरूको विवरण:
प्रहरीका अनुसार घाइतेमध्ये धेरैजसोको अवस्था सामान्य छ भने एक जना मध्यम घाइते छिन्। घाइते हुनेहरूमा:
अमृता तामाङ (२६ वर्ष, सुन्दरहरैंचा–११, मोरङ): टाउको र अनुहारमा चोट (अवस्था मध्यम) र उनकी ३ वर्षीया छोरी सृयान्सी तामाङ (अवस्था सामान्य)।
सबिता थापा (२८ वर्ष, धरान–११, सुनसरी): हातखुट्टामा चोट र उनकी १६ वर्षीया छोरी आरुसी थापा।
अनिसा कटुवाल (३४ वर्ष, धर्मदेवी–१, संखुवासभा): टाउकोमा सामान्य चोट।
पवित्रा कटुवाल (११ वर्ष, धर्मदेवी–१, संखुवासभा): अवस्था सामान्य।
सङ्गिता राई (२५ वर्ष, महालक्ष्मी–६, धनकुटा): बायाँ खुट्टामा चोट।
चक्रबहादुर तामाङ (४७ वर्ष, कानेपोखरी–६, मोरङ): अवस्था सामान्य।
संजिला खत्री (१५ वर्ष, धर्मदेवी–३, संखुवासभा): अवस्था सामान्य।
इन्द्रबहादुर तामाङ (३५ वर्ष, सह-चालक, धर्मदेवी–१, संखुवासभा): अवस्था सामान्य।
दुर्घटनास्थल मुलघाट प्रहरी चौकीबाट करिब ४ किलोमिटर उत्तरमा पर्दछ। दुर्घटनाका कारण केही समय अवरुद्ध भएको सडकखण्डलाई प्रहरीले हाल एकतर्फी रूपमा सञ्चालनमा ल्याएको छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
शुक्रबार, जेठ २९, २०८३
बिहिबार, जेठ २८, २०८३
