काठमाडौं । प्रधानमन्त्री वालेन्द्र शाह (बालेन)ले नेपाल–भारत सीमा क्षेत्रअन्तर्गत लिम्पियाधुरा, कालापानी र लिपुलेकसँग सम्बन्धित विवाद कूटनीतिक संवादमार्फत समाधान गरिने बताएका छन्।

आइतबार (जेठ १७) प्रतिनिधिसभा बैठकमा नेकपा (एमाले) संसदीय दलकी उपनेता पद्मा अर्यालले नेपाली भूमि हुँदै भारत र चीनले व्यापारिक मार्ग सञ्चालन गरिरहेको विषयमा सरकारको धारणा मागेकी थिइन्। त्यसको जवाफ दिँदै प्रधानमन्त्री शाहले नेपाल सरकारले यस विषयमा भारत सरकारलाई औपचारिक रूपमा कूटनीतिक नोट पठाइसकेको जानकारी दिए।

विज्ञापन

उनका अनुसार भारतबाट प्राप्त जवाफमा दुवै देशले आ–आफ्ना ऐतिहासिक दस्तावेज, नक्सा तथा सीमा सम्बन्धी विज्ञहरूको सहभागितामा वार्तामार्फत समस्या समाधान गर्ने सहमति जनाएका छन्।

प्रधानमन्त्री शाहले सीमा विवाद समाधानका लागि भारत र चीनसँग मात्र नभई बेलायत सरकारसँग पनि छलफल भइरहेको बताए। ब्रिटिस भारतको शासनकालसँग सम्बन्धित ऐतिहासिक पृष्ठभूमिका कारण बेलायतको समेत यस विषयमा सरोकार रहने नेपालको धारणा रहेको उनको भनाइ थियो।

उनले सीमा सम्बन्धी सम्पूर्ण विषयहरू कूटनीतिक पहल, संवाद र आपसी समझदारीका आधारमा समाधान गरिने विश्वास व्यक्त गरे।

×

❮

❯