काठमाडौं । तत्कालीन सरकारका पालामा भीभीआईपी उपचारका नाममा गरिएको खर्चबारे अख्तियार दुरुपयोग अनुसन्धान आयोगको छानबिन अन्तिम चरणमा पुगेका बेला नेकपा एमालेले करिब ३ करोड ९० लाख रुपैयाँ राज्यकोषमा जम्मा गरेको छ ।

उच्च स्रोतका अनुसार उक्त रकम ओली नेतृत्वको सरकारका समयमा विभिन्न शीर्षकमा गरिएको खर्चसँग सम्बन्धित देखिन्छ, जसलाई कानुनविपरीत भएको भन्दै अख्तियारले अनुसन्धान गरिरहेको छ ।

बिज्ञापन

सरकारी खर्चको विवरणअनुसार तत्कालीन प्रधानमन्त्री केपी शर्मा ओलीको विदेश उपचारमा करिब २ करोड ३९ लाख रुपैयाँ खर्च भएको थियो । यस्तै पूर्वप्रधानमन्त्री झलनाथ खनालका लागि ८१ लाख रुपैयाँ र पूर्वराष्ट्रपति रामवरण यादवका लागि ७० लाख रुपैयाँ सरकारी ढुकुटीबाट व्यय गरिएको थियो ।

यी खर्चहरू कानुनी प्रावधानअनुसार नभएको दाबी गर्दै अख्तियारले विस्तृत छानबिन अघि बढाएको थियो ।

रकम फिर्ता किन भयो?

स्रोतहरूले जनाएअनुसार, अनुसन्धान अन्तिम चरणमा पुगेको अवस्थामा एमालेले कुल ३ करोड ९० लाख रुपैयाँ राज्यकोषमा फिर्ता गरेको हो । यसलाई सम्भावित कारबाहीबाट जोगिन गरिएको कदमका रूपमा पनि हेरिएको छ ।

तर पार्टीभित्र यस विषयमा औपचारिक छलफल भने नभएको एमाले नेताहरूको भनाइ छ । उनीहरूका अनुसार आगामी शुक्रबार बस्ने सचिवालय बैठकमा यसबारे छलफल हुन सक्नेछ ।

एमालेले हालसम्म रकम फिर्ता सम्बन्धी निर्णयबारे सार्वजनिक रूपमा विस्तृत व्याख्या गरेको छैन । नेताहरूले आन्तरिक छलफलपछि मात्र औपचारिक धारणा आउने बताएका छन् ।

यसैबीच पार्टीले आज सचिवालय बैठक बोलाएको छ, जसमा समसामयिक राजनीतिक विषयसँगै यो प्रकरण पनि उठ्न सक्ने अनुमान गरिएको छ ।

×

❮

❯