विराटनगर । ३०औँ विद्युतीय सुरक्षा दिवसको अवसरमा विराटनगरमा प्रभातफेरीसहित विविध सचेतनामूलक कार्यक्रम आयोजना गरिएको छ। नेपाल विद्युत प्राधिकरण, विराटनगर वितरण केन्द्र र सोसाइटी अफ इलेक्ट्रिकल इन्जिनियर्स नेपालको संयुक्त पहलमा सम्पन्न कार्यक्रममा ‘विद्युत दुर्घटनाबाट बच्न सचेत रहौं, समृद्धिका लागि विद्युतको सदुपयोग गरौं’ भन्ने सन्देश प्रवाह गरिएको थियो।

प्रभातफेरीमा सहभागीहरूले सुरक्षित विद्युत प्रयोग र दुर्घटना न्यूनीकरणका उपायबारे जनचेतना फैलाएका थिए। कार्यक्रममा बोल्दै विद्युत प्राधिकरण विराटनगर वितरण केन्द्रका इलेक्ट्रीकल इन्जिनियर सुवेध ठाकुरले विद्युतीय जोखिम घटाउन उपभोक्ता र प्राविधिक दुवै पक्ष जिम्मेवार हुनुपर्ने बताए। सामान्य लापरबाहीले पनि गम्भीर दुर्घटना निम्त्याउन सक्ने भएकाले सुरक्षित प्रयोगमा विशेष ध्यान दिनुपर्ने उनको भनाइ थियो।

बिज्ञापन

यसैगरी, सहायक प्रबन्धक माधवप्रसाद नगरकोटीले विद्युतीय सुरक्षासम्बन्धी प्रस्तुति दिँदै उपकरण प्रयोग तथा मर्मतका क्रममा सुरक्षात्मक सामग्री अनिवार्य प्रयोग गर्न आग्रह गरे। उनले उपभोक्तालाई पनि विद्युतीय सामग्री सही तरिकाले प्रयोग गर्न सचेत गराए।

कार्यक्रमको समापन गर्दै केन्द्र प्रमुख राम उदगार शाहले सुरक्षित कार्यसंस्कृति विकासका लागि दक्ष जनशक्तिको प्रयोग अपरिहार्य रहेको उल्लेख गरे। उनले कर्मचारी र उपभोक्ता दुवैले जिम्मेवारीपूर्वक भूमिका निर्वाह गर्नुपर्नेमा जोड दिँदै यस्ता सचेतनामूलक कार्यक्रमले विद्युतीय दुर्घटना न्यूनीकरणमा सहयोग पुग्ने विश्वास व्यक्त गरे।

×

❮

❯