विराटनगर । झापा क्षेत्र नम्बर-५ यति बेला राष्ट्रिय राजनीतिको चर्चाको केन्द्रमा छ ।
बिज्ञापन
यो क्षेत्रका ‘हेभिवेट’ उमेदवार मानिएका नेकपा (एमाले)का अध्यक्ष केपी शर्मा ओली र राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन) मनोनयनपत्र दर्तापछि झापा–काठमाडौं ओहोरदोहोरमा व्यस्त छन् । यहाँका कतिपय उमेदवार भने दैनिक रूपमा मतदातासँग प्रत्यक्ष भेटघाट र घरदैलो अभियानमा जुटिरहेका छन् ।
यी उमेदवारहरूको चुनावी दैनिकी फरक देखिन्छ । एमाले र रास्वपाबाहेकका उमेदवार न ठूलो लावालस्करका साथ हिँडिरहेका छन्, न त गाडीको लाम नै देखिन्छ । २०-२५ समर्थक र शुभेच्छुकको सानो समूहसहित उनीहरू मतदातासमक्ष पुगिरहेका छन् ।
झापा-५ मा नेपाली कांग्रेसबाट मन्धरा चिमरिया पौडेल उमेदवार छिन् । उनी सामाजिक सेवामा जीवन समर्पण गरेकी महिला नेतृका रूपमा परिचित छिन् । पौडेल कांग्रेसले देशभर प्रत्यक्षतर्फ उमेदवारी दिएका ११ महिलामध्ये एक हुन् ।
दमक नगरपालिका-९ की बासिन्दा पौडेल बिहानैदेखि छरछिमेक, आफन्त र परिचितका घरमा पुगेर मतदातासँग संवाद गर्छिन् । उनको प्रचारमा महिलाकै सहभागिता उल्लेखनीय देखिन्छ ।
झापा-५ का अर्का प्रत्याशी नेपाली कम्युनिस्ट पार्टी (नेकपा)का रन्जित तामाङ पनि निरन्तर मतदातासमक्ष पुगिरहेका छन् । कमल गाउँपालिका-१ का बासिन्दा तामाङ पूर्वविद्यार्थी नेता हुन् । उनका प्रचार भेटघाटमा नातेदार, पुराना सहपाठी र विद्यार्थी राजनीतिका सहयात्री बढी देखिन्छन् ।
राष्ट्रिय प्रजातन्त्र पार्टी (राप्रपा)बाट उमेदवार बनेका लक्ष्मीप्रसाद संग्रौलाले पनि प्रचार अभियान मन्द तर निरन्तर ढंगले अघि बढाइरहेका छन् । झापा-३ पछि राप्रपाको राम्रो पकड भएको क्षेत्र मानिने झापा-५ मा संग्रौला परिचित नाम हुन् । व्यवसाय र सामाजिक सेवामा सक्रिय उनको चुनावी एजेन्डा राजसंस्था पुनर्स्थापना र हिन्दुराष्ट्र कायम गर्ने विषयमा केन्द्रित छ ।
यसपालि पहिलोपटक चुनावी प्रतिस्पर्धामा रहेको श्रम संस्कृति पार्टीबाट उमेदवार बनेका समीर तामाङको प्रचार शैली अझ फरक देखिन्छ । धरान उपमहानगरपालिकाका पूर्वमेयर हर्क साम्पाङको नेतृत्वमा गठित पार्टीले अघि सारेको ‘श्रम संस्कृतिको राजनीति’लाई तामाङले व्यवहारमा उतारेका छन् ।
उनको पहलमा कमल गाउँपालिका-२ र ४ जोड्ने ढ्यांग्री खोलामा स्थानीयको श्रमदानद्वारा काठेपुल निर्माण गरिएको छ ।
आउँदो फागुन २१ गते हुने प्रतिनिधिसभा सदस्य निर्वाचनमा झापा-५ मा नौ स्वतन्त्रसहित कुल २४ उमेदवार प्रतिस्पर्धामा छन् । उनीहरू सबै विभिन्न प्रकारले मतदाताको ध्यान आफूतर्फ आकर्षण गर्ने अभियानमा छन् ।
सोमबार, जेठ ११, २०८३
सोमबार, जेठ ११, २०८३
