शुक्रबारदेखि नेपाल प्रहरीले भारतको जोगवनी बजारबाट सामान खरिद गरी नेपाल ल्याउने कार्यमा कडाई थालेको छ।
अब जोगवनी नाकाबाट १ सय रुपैयाँभन्दा बढीको सामान खरिद गरी ल्याउँदा अनिवार्य भन्सार महसुल तिर्नुपर्ने नियम लागू गरिएको छ।
भारतले पनि सीमा क्षेत्रमा सुरक्षा चासो राख्दै नेपालबाट भारत प्रवेश गर्ने नागरिकलाई अनिवार्य रूपमा नेपाली नागरिकता वा सरकारी रूपमा प्रमाणीकरण गरिएका कागजात देखाउनुपर्ने नियम लागू गरेको छ।
कागजात नभएका व्यक्तिहरूलाई सीमा नाकाबाटै फर्काउन थालिएको छ । दैनिक रूपमा जोगवनी बजारमा सामान खरिद गर्न जाने नेपालीहरूको भीडले गर्दा नेपालबाट करोडौं रुपैयाँ भारततर्फ गइरहेको अवस्थामा नेपाली व्यापारीहरूले बजारमा ग्राहक अभावको गुनासो गर्दै आएका छन्।
यो समस्या समाधान गर्न गृहमन्त्री लेखकले सशक्त कदम चाल्न निर्देशन दिएका हुन्।
यसअघि पनि जोगवनी नाकामा कडाई गरिए पनि ती निर्णय लामो समय टिक्न नसकेको उदाहरण छ ।
यस पटकको कडाई स्थायी हुने हो वा केही दिनको औपचारिकता मात्रै हो भन्ने विषयमा आम जनताले चासो व्यक्त गरेका छन्।
सीमा नाका हुँदै भारत जाने यात्रुहरूलाई नागरिकता अनिवार्य रूपमा साथमा लिएर जान अनुरोध गरिएको छ।
साथै, भारतबाट सामान खरिद गरी ल्याउँदा नियम उल्लंघन गरेमा नेपाल प्रहरीले सामान जफत गर्ने वा फर्काउने जानकारी दिएको छ।
नयाँ नियमले सीमा नाका व्यवस्थापनमा सुधार ल्याउने अपेक्षा गरिए पनि यसको दीर्घकालीन प्रभावका लागि स्पष्ट योजना र दृढता आवश्यक छ।
बुधबार, असार १८, २०८२
