पहिरोले मेची राजमार्गका विभिन्न स्थानमा लेदो थुुप्रिँदा सवारी साधन चल्न समस्या भइरहेको छ । फाकफोकथुम गाउँपालिका-१, पचेवास्थित आमचोकदेखि घुर्बिसे पञ्चमी हुँदै राँके इलाम आउने भित्री कच्ची सडक अवरुद्ध छ । लेदोसहितको पहिरो झरी सडक पूर्ण रूपमा अवरुद्ध भएको हो ।
इलाम नगरपालिका ११, सोयाकमा केचना–कञ्चनजंघा मार्गमा पहिरो झर्दा सवारी साधन चल्न बन्द भएका छन् । माई नगरपालिका ९, सोक्तिमस्थित इलाम-बिर्तामोड भित्री सडक खण्डमा रुखसहित पहिरो झरेपछि बाटो अवरोध भएको छ ।
सूर्योदय नगरपालिका ६, हर्कटेबाट गुगल रिसोर्ट जाने बाटामा केसर कटवालको घरको माथिको भागबाट पहिरो गएको छ ।
इलाम नगरपालिका ९, गोलबस्तीका राकेश थापामगरको टिनको छानो र इँटा-माटोले बनेको २ तले घर आधा भत्किएको छ । वर्षाका कारण जीर्ण घरको दक्षिणतर्फको आधा भाग भत्किएको प्रहरीले जनाएको छ । घटनामा दुई जना घाइते भएका छन् ।
हिजो अपराह्नदेखि इलामका अधिकांश स्थानमा निरन्तर पानी परिरहेको छ । बिहान केहीबेर बिदो भएपनि अहिले पानी परिरहँदा पहिरो र बाढीको जोखिम बढ्दैछ ।
बिहिबार, साउन २९, २०८२
बिहिबार, साउन २९, २०८२
