झापा । झापाको हल्दीबारी गाउँपालिका–४, ओली चोकमा मंगलबार बिहान एक घरमा आगलागी हुँदा निभाउने क्रममा एकै परिवारका चार जना घाइते भएका छन्।

जिल्ला प्रहरी कार्यालय झापाका प्रवक्ता डीएसपी खगेन्द्रबहादुर खड्काका अनुसार ६० वर्षीय पुण्यप्रसाद ओलीको तीन तले पक्की घरको दोस्रो तलाको भान्सामा बिहान ८:४० बजे रोटी पकाउने क्रममा आगो लागेको थियो। आगो निभाउने प्रयासमा घरधनी ओलीसहित उनका दुई छोरा — ३३ वर्षीय सन्तोष ओली, २० वर्षीय आर्यन ओली — र ३२ वर्षीया बुहारी अनिता ओली घाइते भएका हुन्।

प्रवक्ता खड्काले जानकारी दिएअनुसार पुण्यप्रसादको अवस्था मध्यम छ भने अन्य तीन जनाको अवस्था सामान्य रहेको छ। प्रारम्भिक उपचारपछि उनीहरूलाई थप उपचारका लागि भद्रपुरको ओमसाई पाथीभरा अस्पताल हुँदै विराटनगर लगिएको हो।

आगोबाट भान्सा कोठामा आंशिक क्षति पुगेको छ। स्थानीयको सहयोगमा करिब ४५ मिनेटको प्रयासपछि आगो नियन्त्रणमा आएको र घटनाबारे थप अनुसन्धान भइरहेको प्रहरीले जनाएको छ।

×

❮

❯