काठमाडौं । देशको उपल्लो वायुमण्डलमा सक्रिय पश्चिमी न्यूनचापीय रेखा (ट्रफ) तथा स्थानीय वायुको आंशिक प्रभावका कारण आज देशका विभिन्न क्षेत्रमा बदली र वर्षाको सम्भावना रहेको छ।
जल तथा मौसम पूर्वानुमान महाशाखाका अनुसार हाल लुम्बिनी, कर्णाली र सुदूरपश्चिम प्रदेशसहित अधिकांश हिमाली तथा पहाडी क्षेत्रमा सामान्य बदली रहेको छ भने तराईका भूभागमा आंशिक बदली देखिएको छ। बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित हल्का वर्षा भइरहेको छ।
बिज्ञापन
महाशाखाले आज दिउँसो कोशी प्रदेशसहित हिमाली क्षेत्रमा सामान्य बदली रहने तथा मधेश प्रदेशसहित अन्य पहाडी भूभागमा आंशिक बदली रहने जनाएको छ। तराईका अधिकांश क्षेत्रमा भने मौसम मुख्यतः सफा रहने अनुमान गरिएको छ।
कोशी प्रदेशका केही स्थान तथा बागमती र गण्डकी प्रदेशका हिमाली तथा पहाडी क्षेत्रमा मेघगर्जन र चट्याङसहित मध्यम वर्षा हुन सक्ने सम्भावना छ। साथै मधेश प्रदेशसहित अन्य हिमाली क्षेत्रका एक–दुई स्थानमा वर्षा तथा हिमपात हुन सक्ने पूर्वानुमान गरिएको छ।
महाशाखाका अनुसार मधेश, बागमती, गण्डकी, लुम्बिनी र सुदूरपश्चिम प्रदेशका तराईका केही क्षेत्रमा तापक्रम अस्वाभाविक रूपमा बढ्न सक्ने भएकाले सतर्कता अपनाउन आग्रह गरिएको छ।
आज राति पनि कोशी प्रदेशसहित हिमाली क्षेत्रमा सामान्य बदली रहने तथा मधेश प्रदेश र अन्य पहाडी क्षेत्रमा आंशिक बदली कायम रहनेछ। तराईका अधिकांश क्षेत्रमा मौसम मुख्यतः सफा रहने अनुमान छ।
रातिको समयमा कोशी प्रदेशका केही तथा मधेश, बागमती र गण्डकी प्रदेशका हिमाली तथा पहाडी क्षेत्रका एक–दुई स्थानमा मेघगर्जन, चट्याङसहित हल्का वर्षा वा हिमपात हुन सक्ने सम्भावना रहेको महाशाखाले जनाएको छ।
मौसमसम्बन्धी जोखिमलाई ध्यानमा राख्दै महाशाखाले विशेषगरी उच्च तापक्रमको सम्भावना रहेका तराई क्षेत्रका बासिन्दालाई आवश्यक सावधानी अपनाउन तथा नियमित रूपमा मौसमसम्बन्धी अद्यावधिक सूचना पछ्याउन अनुरोध गरेको छ।
शनिबार, जेठ २३, २०८३
शुक्रबार, जेठ २२, २०८३
