विराटनगर । फिफा विश्वकप २०२६ सुरु हुन अब नौ दिन मात्र बाँकी रहँदा विश्व फुटबल महासंघ (फिफा) ले प्रतियोगितामा सहभागी हुने ४८ वटै राष्ट्रका अन्तिम टोली (स्क्वाड) सार्वजनिक गरेको छ।
टोली घोषणा भएसँगै कुन राष्ट्रबाट कुन खेलाडीले विश्वकप खेल्नेछन् भन्ने समर्थकहरूको चासो र कौतुहलता पनि समाप्त भएको छ।
बिज्ञापन
अमेरिका, मेक्सिको र क्यानडाले संयुक्त रूपमा आयोजना गर्न लागेको २३औँ संस्करणको फिफा विश्वकप जुन ११ देखि सुरु हुँदैछ। पहिलो पटक तीन राष्ट्रमा आयोजना हुन लागेको यस संस्करणमा अहिलेसम्मकै सबैभन्दा धेरै ४८ राष्ट्रले प्रतिस्पर्धा गर्नेछन् भने कुल १०४ खेल खेलाइनेछ। प्रतियोगिताका लागि १,२४८ खेलाडी अन्तिम टोलीमा समावेश भएका छन्।
फिफाले यस संस्करणलाई विश्व फुटबलका लागि ऐतिहासिक मोडका रूपमा व्याख्या गरेको छ। प्रतियोगितामा थप राष्ट्र, खेलाडी र समर्थकलाई समेट्दै विश्वकपको पहुँच अझ फराकिलो भएको फिफाको भनाइ छ।
घोषित टोलीमा यसअघि कम्तीमा एक पटक विश्वकप खेलिसकेका ३५७ खेलाडी रहेका छन् भने ८९१ खेलाडीले पहिलो पटक विश्वकपको अनुभव लिने अवसर पाएका छन्। यसले फुटबलमा अनुभव र नयाँ प्रतिभाको सन्तुलित मिश्रण देखाएको फिफाले जनाएको छ।
यस पटक सहभागी खेलाडीहरूको उमेर अन्तर पनि रोचक रहेको छ। स्कटल्याण्डका गोलरक्षक क्रेग गोर्डन ४३ वर्ष १६२ दिनका साथ सबैभन्दा ज्येष्ठ खेलाडी हुन् भने मेक्सिकोका गिल्बर्टो मोरा १७ वर्ष २४० दिनका साथ सबैभन्दा कान्छा खेलाडीका रूपमा टोलीमा परेका छन्। प्रतियोगिता सुरु हुँदा २० वर्षभन्दा कम उमेरका २२ खेलाडी र ४० वर्ष वा सोभन्दा बढी उमेरका सात खेलाडी मैदानमा उत्रने सम्भावना रहेको छ।
विश्वकप विजेता रहिसकेका २२ खेलाडी पनि यस संस्करणमा सहभागी हुने टोलीमा समावेश छन्। साथै, केप भर्डे, कुराकाओ, जोर्डन र उज्वेकिस्तानले पहिलो पटक विश्वकपमा सहभागिता जनाउँदै नयाँ इतिहास रच्न लागेका छन्।
उज्वेकिस्तानको पहिलो विश्वकप सहभागिता विशेष आकर्षणका रूपमा हेरिएको छ। टोलीमा म्यानचेस्टर सिटीका युवा डिफेन्डर अब्दुकुदिर खुसानोभजस्ता प्रतिभाशाली खेलाडी समावेश छन्। यस्तै फ्रान्सका वारेन जेयर-एम्री, न्युजिल्याण्डका फिन सुरम्यान र मोरक्कोका बिलाल एल खानौसजस्ता युवा खेलाडीहरू पनि चर्चामा छन्।
अर्जेन्टिनाका कप्तान लियोनेल मेसी, पोर्चुगलका क्रिस्टियानो रोनाल्डो तथा मेक्सिकोका गोलरक्षक गुइलेर्मो ओचोआले छैटौँ पटक विश्वकप खेल्ने अवसर पाएका छन्। मेसी र रोनाल्डो दुवै विश्वकपको इतिहासमा छ पटक खेल्ने कीर्तिमान कायम गर्ने अभियानमा रहेका छन्।
फिफाका अनुसार विश्वकप २०२६ मा ७१ देशका ४४९ विभिन्न क्लबका खेलाडीहरूले प्रतिनिधित्व गर्नेछन्। तीमध्ये युरोपका ३५, एसियाका १४, कोन्मेबोलका ८, कन्काकाफका ७, अफ्रिकाका ६ तथा ओसियानाका १ क्लबका खेलाडी समावेश छन्।
कतार र साउदी अरेबियाले लगभग पूर्ण रूपमा घरेलु लिगका खेलाडीलाई टोलीमा राखेका छन्। दुवै राष्ट्रका २६ मध्ये २५ खेलाडी आफ्नै देशको लिगमा आबद्ध छन्। विपरीत रूपमा, केप भर्डे, कंगो डीआर, आइभरी कोस्ट, कुराकाओ, सेनेगल र उरुग्वेका टोलीहरू पूर्ण रूपमा विदेशी लिगमा खेलिरहेका खेलाडीबाट बनेका छन्।
प्रशिक्षकतर्फ घानाका प्रशिक्षक कार्लोस क्विरोज लगातार पाँचौँ विश्वकपमा टोली सम्हाल्ने दुर्लभ उपलब्धिको नजिक छन्। उनले यसअघि पोर्चुगल र इरानको नेतृत्व गर्दै चार विश्वकपमा सहभागिता जनाइसकेका छन्।
फिफा विश्वकप २०२६ को नियमअनुसार कुनै पनि टोलीले आफ्नो पहिलो खेल सुरु हुनुभन्दा २४ घण्टा अघिसम्म गम्भीर चोट वा बिरामीका कारण मात्र खेलाडी परिवर्तन गर्न सक्नेछ। अन्य अवस्थामा फिफाको विशेष स्वीकृति आवश्यक पर्नेछ।
बुधबार, जेठ २०, २०८३
बुधबार, जेठ २०, २०८३
