विराटनगर । विराटनगरमा भारतीय नम्बर प्लेटको मोटरसाइकलबाट स्रोत नखुलेको नगद बरामद गरिएको छ भने रकम ओसारपसारमा संलग्न एक भारतीय नागरिक पक्राउ परेका छन्।

सशस्त्र प्रहरी बल नेपाल, सीमा सुरक्षा गुल्म हेडक्वार्टर रानीबाट खटिएको डीएसपी तिलकबहादुर खड्काको नेतृत्वको टोलीले विराटनगर महानगरपालिका–१५ स्थित दुई नम्बर ढाटबाट ५ लाख १ सय १५ रुपैयाँ बरामद गरेको हो। भारतबाट नेपालतर्फ आउँदै गरेको बीआर ३८ एनएन १४३८ नम्बरको मोटरसाइकललाई बिहीबार दिउँसो करिब २ बजे नियन्त्रणमा लिएर जाँच गर्दा उक्त रकम फेला परेको हो।

बिज्ञापन

जाँचका क्रममा मोटरसाइकल चालक भारत, बिहार राज्यको अररिया जोगवनी–१० का ३० वर्षीय आनेशकुमार चौधरीको साथबाट स्रोत नखुलेको रकम बरामद भएको सशस्त्र प्रहरीले जनाएको छ। बरामद रकममा एक हजार दरका २०० थान, पाँच सय दरका ६०० थान, एक सय दरको १ थान, साथै १० र ५ रुपैयाँका एक/एक थान नोट रहेका छन्।

रकमको स्पष्ट स्रोत खुलाउन नसकेपछि चौधरीलाई नियन्त्रणमा लिइएको हो। प्रहरीले उक्त रकम अवैध हुण्डी कारोबारसँग सम्बन्धित हुनसक्ने आशंका गरेको छ।

बरामद नगद तथा मोटरसाइकलसहित चौधरीलाई आवश्यक अनुसन्धान र कारबाहीका लागि इलाका प्रहरी कार्यालय रानीमा बुझाइएको छ। इन्स्पेक्टर कविन राईको नेतृत्वमा थप अनुसन्धान भइरहेको प्रहरीले जनाएको छ।

×

❮

❯